Si-phian 第 147 章 - 巴克禮全羅

1

Lín tio̍h o-ló Iâ-hô-hoa; In-ūi chhiùⁿ-koa o-ló lán ê Siōng-tè, sī chin-hó chin-biāu; O-ló sī ha̍p-gî.

2

Iâ-hô-hoa khí-chō Iâ-lō͘-sat-léng; Chū-chı̍p Í-sek-lia̍t tiong siū chhian-sóa ê lâng;

3

I i-hó siong-sim ê lâng; Pau in ê siong.

4

I sǹg chhiⁿ-sîn ê siàu-gia̍h; Sûi-lia̍p kā i hō-miâ.

5

Lán ê Chú chì-tōa, ke̍k ū khùi-la̍t; I ê tì-hūi bû-kiông-chīn.

6

Iâ-hô-hoa hû-chhî khiam-pi ê lâng; Chiong pháiⁿ-lâng kàng-kē kàu thô͘-kha.

7

Lín tio̍h ēng kám-siā ǹg Iâ-hô-hoa chhiùⁿ-koa; Tôaⁿ-khîm chhiùⁿ-koa, o-ló lán ê Siōng-tè.

8

I khí-hûn jia-thiⁿ, Ūi-tio̍h tōe pī-pān hō͘, Hō͘ soaⁿ hoat-chháu.

9

I siúⁿ-sù chia̍h-mı̍h hō͘ cháu-siù, Kap teh-háu ê o͘-a-kiáⁿ.

10

I bô ì-ài bé ê la̍t tōa, I bô hoaⁿ-hí lâng ê kha gâu-cháu.

11

Iâ-hô-hoa sī hoaⁿ-hí kèng-ùi I, Kap ǹg-bāng I chû-ài ê lâng.

12

Iâ-lō͘-sat-léng ah, lí tio̍h chheng-ho͘ Iâ-hô-hoa; Sek-an ah, lí tio̍h o-ló lí ê Siōng-tè.

13

In-ūi I kian-kò͘ lí ê mn̂g-kông; Sù-hok hō͘ lí tiong-kan ê kiáⁿ-jî.

14

I hō͘ lí ê kéng-lāi thài-pêng; Ēng siōng-hó ê be̍h hō͘ lí chia̍h-pá.

15

I hoat-chhut bēng-lēng tī tōe--nih, I ê ōe pan-hêng chin-kín.

16

I kàng-lo̍h seh chhin-chhiūⁿ mî-hoe, Ia̍h lo̍h-sng chhin-chhiūⁿ hé-hu.

17

I hiat-lo̍h pha̍uh chı̍t-tè chı̍t-tè; I hoat-chhut kôaⁿ-chhìn, chī-chūi tòng-ōe-tiâu?

18

I chı̍t-ē chhut-lēng, chiah-ê chiū lóng iûⁿ; I hō͘ hong chhe, chúi chiū lâu.

19

I chiong I ê ōe chí-sī Ngá-kok, Chiong I ê lu̍t-lē kap phòaⁿ-tòan, chí-sī Í-sek-lia̍t.

20

I m̄-bat án-ni khóan-thāi pa̍t-kok; I ê phòaⁿ-tòan, in lóng m̄-bat. Lín tio̍h o-ló Iâ-hô-hoa.