Si-phian 第 148 章 - 巴克禮全羅

1

Lín tio̍h o-ló Iâ-hô-hoa. Tùi thiⁿ-téng o-ló Iâ-hô-hoa; Tī kôaiⁿ ê só͘-chāi o-ló I.

2

I ê chèng sù-chiá ah, lín tio̍h o-ló I. I ê chèng thian-kun ah, lín tio̍h o-ló I.

3

Jı̍t kap ge̍h ah, lín tio̍h o-ló I; Hoat-kng ê chhiⁿ-sîn ah, lín lóng tio̍h o-ló I.

4

Thiⁿ-téng ê thiⁿ, kap thiⁿ í-chiūⁿ ê chúi ah, Lín lóng tio̍h o-ló I.

5

Chiah-ê lóng tio̍h o-ló Iâ-hô-hoa ê miâ; In-ūi I chı̍t-ē bēng-lēng, chiū lóng siū chhòng-chō.

6

I chiong chiah-ê kiàn-lı̍p, kàu éng-éng óan-óan; I ū tēng-lē, bōe-ōe hòe-bô.

7

Tùi tōe-chiūⁿ tio̍h o-ló Iâ-hô-hoa, Chiū-sī tōa-hî kap it-chhè ê chhim-ian;

8

Hé kap peng-pha̍uh, seh kap hûn-bū; Thàn I ê ōe ê kông-hong;

9

Tōa-soaⁿ kap it-chhè ê sió-soaⁿ; Kiat ké-chí ê chhiū, kap it-chhè ê pek-hiuⁿ-chhiū;

10

Iá-siù kap it-chhè ê cheng-siⁿ; Thâng-thōa kap pe-chiáu;

11

Sè-chiūⁿ ê kun-ông kap bān-bîn; Kùi-cho̍k kap sè-chiūⁿ it-chhè ê sím-phòaⁿ-koaⁿ;

12

Siàu-liân-lâng kap chāi-sek-lú; Lāu-lâng kap gín-ná;

13

Chiah-ê lóng tio̍h o-ló Iâ-hô-hoa ê miâ; In-ūi chí-ū I ê miâ siū chun chòe kôaiⁿ; I ê êng-kng pôaⁿ-kè thiⁿ tōe.

14

I heng-khí I ê peh-sìⁿ ê kak, Hō͘ I sèng ê peh-sìⁿ lóng o-ló I, Chiū-sī Í-sek-lia̍t lâng, chhin-kūn Chú hit ê peh-sìⁿ. Lín tio̍h o-ló Iâ-hô-hoa.