Si-phian 第 149 章 - 巴克禮全羅

1

Lín tio̍h o-ló Iâ-hô-hoa. Tio̍h chhiùⁿ sin ê koa, o-ló Iâ-hô-hoa; Tī sèng ê peh-sìⁿ ê hōe-tiong o-ló I.

2

Gōan Í-sek-lia̍t in-ūi chō i ê Chú lâi hoaⁿ-hí; Gōan Sek-an ê peh-sìⁿ in-ūi in ê Ông lâi khòai-lo̍k.

3

Gōan in thiàu-bú o-ló I ê miâ; Phah-kó͘ tôaⁿ-khîm, chhiùⁿ-koa o-ló I.

4

In-ūi Iâ-hô-hoa hoaⁿ-hí I ê peh-sìⁿ; I beh ēng kiù-un chòe khiam-pi ê lâng ê chng-thāⁿ.

5

Gōan sèng ê peh-sìⁿ in-ūi só͘ tit-tio̍h ê êng-kng lâi hoaⁿ-hí; Gōan in tī bîn-chhn̂g--nih chhut hoaⁿ-hí ê siaⁿ.

6

Gōan in ê chhùi o-ló Siōng-tè chòe-kôaiⁿ, Chhiú kia̍h siang-bīn lāi ê kiàm;

7

Thang pò-èng gōa-pang, Hêng-ho̍at lia̍t-kok;

8

Ēng liān pa̍k in ê kun-ông, Ēng thih-khàu lâi só in ê jîn-sîn;

9

Beh tī in ê sin-chiūⁿ kiâⁿ só͘ kì-chài ê phòaⁿ-tòan; I sèng ê peh-sìⁿ lóng ū chit-hō êng-kng. Lín tio̍h o-ló Iâ-hô-hoa.