Si-phian 第 16 章 - 巴克禮全羅

1

Tāi-pı̍t kim ê si.1) Siōng-tè ah, kiû Lí pó-hō͘ góa; in-ūi góa óa-khò Lí.

2

Góa ê lêng ah, lí bat tùi Iâ-hô-hoa kóng, Lí sī góa ê Chú, Lí í-gōa, góa bô hok-khì.

3

Lūn-kàu tōe-chiūⁿ sèng ê peh-sìⁿ, In sī ke̍k-kî hó, sī góa só͘ chhim-chhim hoaⁿ-hí ê.

4

Ēng pa̍t ê sîn thòe-ōaⁿ Iâ-hô-hoa ê, in ê iu-khó͘ beh ná ke-thiⁿ; In hiàn tiān-huih ê chè, góa bô beh hiàn; Góa ê chhùi-tûn ia̍h m̄ thê-khí in ê miâ.

5

Iâ-hô-hoa sī góa ê sán-gia̍p, kap góa poe-tiong ê hūn-gia̍h; Góa só͘ èng-tit--ê, Lí kā góa kò͘-siú.

6

Só͘ niû hō͘ góa ê tōe, sī tī chin súi ê só͘-chāi; Góa ê sán-gia̍p sı̍t-chāi chin hó.

7

Góa beh o-ló hit ê kà-sī góa ê Iâ-hô-hoa; Mî--sî góa ê sim-tn̂g ia̍h chí-tiám góa.

8

Góa siông-siông kèng-hōng Iâ-hô-hoa tī góa ê bīn-chêng; In-ūi I tī góa ê chiàⁿ-pêng, góa chiū bô iô-choah.

9

In-ūi án-ni góa ê sim hoaⁿ-hí, góa ê sîn khòai-lo̍k; Góa ê jio̍k-sin ia̍h beh an-jiân khiā-khí.

10

In-ūi Lí bô chiong góa ê lêng-hûn pàng-hē tī im-kan; Ia̍h bô hō͘ Lí ê sèng--ê tú-tio̍h hiú-nōa.

11

Lí beh chiong o̍ah-miā ê lō͘ chí-sī góa; Tī Lí ê bīn-chêng ū móa-chiok ê hoaⁿ-hí; Tī Lí ê chiàⁿ-chhiú ū éng-óan ê khòai-lo̍k.