Si-phian 第 17 章 - 巴克禮全羅

1

Tāi-pı̍t ê kî-tó.1) Iâ-hô-hoa ah, kiû Lí thiaⁿ kong-gī, liû-sim thiaⁿ góa ê kiû-kiò; Góa ê kî-tó m̄-sī tùi kan-chà ê chhùi-tûn chhut; kiû Lí àⁿ hī-khang lâi thiaⁿ.

2

Gōan góa ê phòaⁿ-sû tùi Lí ê bīn-chêng hoat-chhut, Gōan Lí ê ba̍k-chiu kàm-chhat chèng-tı̍t.

3

Lí í-keng chhì-giām góa ê sim, Lí tī mî--sî kàm-chhat góa; Lí thòan-liān góa, bô chhē--tio̍h sím-mı̍h; Góa lı̍p-chì, hō͘ góa ê chhùi bô ū kè-sit.

4

Lūn-kàu lâng ê kiâⁿ-chòe, góa thàn Lí só͘ kóng ê ōe, Ka-kī kín-siú, bô kiâⁿ kiông-ok lâng ê lō͘.

5

Góa ê kha tiāⁿ-tiāⁿ kiâⁿ Lí ê lō͘, Góa ê kha bē-bat ta̍h-chhū.

6

Siōng-tè ah, lūn-kàu góa, góa bat kiû-kiò Lí, in-ūi Lí beh ìn góa; Kiû Lí àⁿ hī-khang thiaⁿ góa ê ōe.

7

Kiû Lí hián-bêng Lí koh-iūⁿ ê jîn-chû, Lí sī ēng chiàⁿ-chhiú kiù óa-khò Lí ê lâng, Thoat-lī hiah ê khí-lâi kong-kek in--ê.

8

Kiû Lí pó-hō͘ góa chhin-chhiūⁿ pó-hō͘ ba̍k-chiu-jîn, Chiong góa khàm-ba̍t tī Lí ê sı̍t-ē.

9

Hō͘ góa thoat-lī hiah ê chhiúⁿ-kiap góa ê pháiⁿ-lâng, Chiū-sī ûi-khùn góa, beh hāi góa sìⁿ-miā ê tùi-te̍k.

10

In hō͘ ka-kī ê iû pau-ba̍t; In ê chhùi kóng kiau-ngō͘ ê ōe.

11

In hiān-chāi ûi-khùn góan ê kha-pō͘; In chù-ba̍k beh chhia-tó góan tī tōe--nih.

12

In chhin-chhiūⁿ sai siàu-siūⁿ beh kā mı̍h; Koh chhin-chhiūⁿ béng ê sai-á-thûn bih tī àm-ba̍t ê só͘-chāi.

13

Iâ-hô-hoa ah, kiû Lí khí--lâi, tí-tng tùi-te̍k; Chiong i táⁿ-tó; Ēng Lí ê to kiù góa ê sìⁿ-miā thoat-lī pháiⁿ-lâng.

14

Iâ-hô-hoa ah, ēng Lí ê chhiú kiù góa thoat-lī sè-kan-lâng; Thoat-lī hiah ê tī kim-seng ū hok-hūn ê sè-kan-lâng. Lí chiong Lí ê châi-pó chhiong-móa in ê pak-tó͘; In ū kiáⁿ-jî kàu sim-móa ì-chiok; chiong kî-û ê châi-bu̍t lâu hō͘ in ê eⁿ-á.

15

Lūn-kàu góa, góa beh tī gī ê tiong-kan khòaⁿ-kìⁿ Lí ê bīn; Góa khùn-chhíⁿ ê sî, khòaⁿ-kìⁿ Lí ê hêng-iông, chiū sim-móa ì-chiok.