Si-phian 第 18 章 - 巴克禮全羅

1

Iâ-hô-hoa ê lô͘-po̍k Tāi-pı̍t ê si; kau hō͘ Ga̍k-koaⁿ. Tng Iâ-hô-hoa kiù i thoat-lī it-chhè ê tùi-te̍k, kap Sò-lô ê chhiú ê jı̍t, i tùi Iâ-hô-hoa liām chit ê si ê ōe; kóng,1) Iâ-hô-hoa góa ê khùi-la̍t ah, góa thiàⁿ Lí.

2

Iâ-hô-hoa sī góa ê soaⁿ-giâm, góa ê soaⁿ-chē, góa ê Kiù-chú; Góa ê Siōng-tè, góa ê chio̍h-pôaⁿ, góa beh óa-khò I; I sī góa ê tîn-pâi, sī kiù góa ê kak, sī góa ê kôaiⁿ-tâi.

3

Góa beh kiû-kiò eng-kai o-ló ê Iâ-hô-hoa; Góa chiū tit-tio̍h kiù thoat-lī góa ê tùi-te̍k.

4

Sí-bô ê soh tîⁿ góa, Húi-lūi ê tōa-chúi hō͘ góa kiaⁿ.

5

Im-kan ê soh ûi-khùn góa, Sí-bô ê lô-bāng lîm-kàu góa.

6

Góa tī khó͘-lān-tiong kî-kiû Iâ-hô-hoa, Tùi góa ê Siōng-tè kiû-kiò; I tùi I ê tiān-lāi thiaⁿ góa ê siaⁿ, Góa tī I ê bīn-chêng só͘ kiû--ê jı̍p tī I ê hī-khang.

7

In-ūi I siū-khì, tōe chiū iô koh choah; Soaⁿ ê tōe-ki ia̍h tín-tāng iô-choah.

8

Tùi I ê phīⁿ-khang chhèng-chhut ian, Tùi I ê chhùi-lāi hoat-chhut hé, Thô͘-thòaⁿ tùi án-ni to̍h.

9

I hō͘ thiⁿ sûi-lo̍h kē, pún-sin lîm-kàu, I ê kha-ē o͘-àm-àm.

10

I khiâ ki-lō͘-peng teh pe; I ēng hong ê sı̍t kín-kín pe.

11

I ēng o͘-àm chòe bih-sin ê só͘-chāi, chòe tiùⁿ-pâng lâi ûi I; Chiū-sī chúi ê o͘-àm, khong-tiong ê ba̍t-hûn.

12

In-ūi I thâu-chêng ê kng, chiū I ê ba̍t-hûn kiâⁿ kè-khì, Ū pha̍uh kap to̍h ê thô͘-thòaⁿ.

13

Iâ-hô-hoa tī thiⁿ--nih khí lûi, Chì-kôaiⁿ--ê chhut I ê siaⁿ; Ū pha̍uh kap to̍h ê thô͘-thòaⁿ.

14

I siā-chhut I ê chìⁿ, hō͘ tùi-te̍k sì-sòaⁿ; Hoat-chhut chōe-chōe sih-nà, hō͘ in jiáu-lōan.

15

Iâ-hô-hoa ah, Lí ê chek-pī chı̍t-ē hoat, Lí ê phīⁿ-khang ê khì chı̍t-ē chhut, Chúi-tóe chiū chhut-hiān, Tōa-tōe ê kun-ki ia̍h lō͘-hiān.

16

I tùi téng-bīn chhun-chhiú khiú góa, Khan góa chhut tōa-chúi ê tiong-kan.

17

I kiù góa thoat-lī góa béng ê tùi-te̍k, Í-kı̍p hiah ê òan-hūn góa ê lâng; In-ūi in pí góa khah-kiông.

18

Góa tú-tio̍h chai-lān ê jı̍t, in lâi kong-kek góa; chóng-sī Iâ-hô-hoa sī góa só͘ óa-khò--ê.

19

I ia̍h chhōa góa kàu khui-khoah ê só͘-chāi, I kiù góa, in-ūi I hoaⁿ-hí góa.

20

Iâ-hô-hoa chiàu góa ê gī pò-tap góa; Chiàu góa chhiú ê chheng-khì pò-siúⁿ góa.

21

In-ūi góa chun-siú Iâ-hô-hoa ê tō-lō͘, Bē-bat chòe-pháiⁿ, lī-khui góa ê Siōng-tè.

22

I ê hoat-lu̍t lóng tī góa ê bīn-chêng; I ê lé-gî, góa bē-bat khì-sak.

23

Góa tī I ê bīn-chêng chòe ôan-chôan, Góa ia̍h pó-siú ka-kī, lī-khui góa ê chōe-ok.

24

Só͘-í Iâ-hô-hoa pò-siúⁿ góa, sī chiàu góa ê gī; Ia̍h sī chiàu góa tī I ê ba̍k-chiu chêng, góa chhiú ê chheng-khì.

25

Chû-ài ê lâng, Lí ēng chû-ài khóan-thāi i; Ôan-chôan ê lâng, Lí ēng ôan-chôan khóan-thāi i;

26

Chheng-khì ê lâng, Lí ēng chheng-khì khóan-thāi i; Kōai-phiah ê lâng, Lí ēng oan-khiau khóan-thāi i.

27

In-ūi khùn-khó͘ ê peh-sìⁿ, Lí beh kiù i; Chū-ko ê ba̍k-chiu, Lí beh hō͘ i hê--lo̍h-khì.

28

In-ūi Lí beh tiám-to̍h góa ê teng; Iâ-hô-hoa góa ê Siōng-tè beh chiò-kng góa ê àm.

29

In-ūi góa óa-khò Lí, chhiong-jı̍p kun-tūi, Óa-khò góa ê Siōng-tè thiàu-kè chhiûⁿ.

30

Lūn-kàu Siōng-tè, I ê lō͘ sī ôan-chôan; Iâ-hô-hoa ê ōe sī kè thòan-liān--ê; Kìⁿ-nā óa-khò I--ê, I chiū chòe in ê tîn-pâi.

31

In-ūi Iâ-hô-hoa í-gōa, chī-chūi sī Siōng-tè? Góan ê Siōng-tè í-gōa, chī-chūi sī chio̍h-pôaⁿ?

32

Chiū-sī hit ê ēng khùi-la̍t hâ góa ê io, Hō͘ góa ê lō͘ ôan-chôan ê Siōng-tè.

33

I hō͘ góa ê kha chhin-chhiūⁿ lo̍k-bú ê kha, Koh an-tì góa tī góa kôaiⁿ ê só͘-chāi.

34

I kà-sī góa ê chhiú gâu kau-chiàn, Tì-kàu góa ê chhiú-kut ōe khui tâng ê keng.

35

Lí ēng Lí kiù-un ê tîn-pâi hō͘ góa; Lí ēng chiàⁿ-chhiú hû-chhî góa; Lí ê un-hô hō͘ góa chòe tōa.

36

Lí hō͘ góa só͘ ta̍h ê tōe khui-khoah; Góa ê kha bē-bat ta̍h-chhū.

37

Góa beh tui góa ê tùi-te̍k, ia̍h beh jip--tio̍h in; In iáu-bē bia̍t-bô ê tāi-seng, góa bô beh tò-tńg.

38

Góa beh phah in thiám-thiám, tì-kàu in bōe khí-lâi; In beh tó tī góa ê kha-ē.

39

In-ūi Lí bat ēng khùi-la̍t hâ góa ê io, hō͘ góa gâu kau-chiàn; Lí hō͘ hiah ê khí-lâi kong-kek góa--ê, lóng hâng-ho̍k tī góa ê ē-bīn.

40

Lí ia̍h hō͘ góa ê tùi-te̍k o̍at-tńg-sin tô-cháu; Hō͘ góa ōe châu-bia̍t hiah ê òan-hūn góa ê lâng.

41

In kiû-kiò, ia̍h bô lâng kiù in; Chiū kiû-kiò Iâ-hô-hoa, I ia̍h bô ìn.

42

Góa tûi in kàu chhùi-chhùi, chhin-chhiūⁿ hong chhe ê thô͘-hún; Piàⁿ-chhut in, chhin-chhiūⁿ koe-lō͘ ê thô͘-bê.

43

Lí kiù góa thoat-lī peh-sìⁿ ê saⁿ-chiⁿ; Lí siat-lı̍p góa chòe lia̍t-pang ê thâu; Góa pún-jiân m̄-bat ê peh-sìⁿ beh ho̍k-sāi góa;

44

In chı̍t-ē thiaⁿ-kìⁿ góa ê miâ chiū beh sūn-thàn góa; Īⁿ-pang ê lâng beh tâu-hâng góa.

45

Īⁿ-pang lâng beh soe-thè, Kiaⁿ-hiâⁿ ngia̍uh-ngia̍uh-chhoah, chhut in ê iâⁿ-chē.

46

Iâ-hô-hoa sī o̍ah--ê, gōan góa ê chio̍h-pôaⁿ tit-tio̍h o-ló; Gōan kiù góa ê Siōng-tè tit-tio̍h seng-kôaiⁿ.

47

Chit ê Siōng-tè chiū-sī hit ê kā góa sin-oan, Hō͘ chèng peh-sìⁿ hâng-ho̍k tī góa ê ē-bīn--ê.

48

I kiù góa thoat-lī góa ê tùi-te̍k, Lí chiong góa kú-khí khah kôaiⁿ hiah ê khí-lâi kong-kek góa ê; Lí kiù góa thoat-lī kiông-pō ê lâng.

49

Iâ-hô-hoa ah, in-ūi án-ni góa beh tī lia̍t-pang-tiong kám-siā Lí; Chhiùⁿ-koa o-ló Lí ê miâ.

50

Iâ-hô-hoa siúⁿ-sù ke̍k-tōa ê kiù-un, hō͘ I só͘ siat-lı̍p ê ông; Si-chhut chû-ài hō͘ I siū-boah-iû ê, Chiū-sī hō͘ Tāi-pı̍t kap i ê hō͘-è, tı̍t-kàu éng-óan.