Si-phian 第 19 章 - 巴克禮全羅

1

Tāi-pı̍t ê si; kau hō͘ Ga̍k-koaⁿ.1) Chiah ê thiⁿ kóng-khí Siōng-tè ê êng-kng, Kiong-chhong pò-iông I ê chhiú só͘ chòe--ê.

2

Chit-jı̍t tùi hit-jı̍t hoat-chhut giân-gú, Chit-mî tùi hit-mî thôan-chhut chai-bat.

3

Bô giân bô gú; In ê siaⁿ bô thang thiaⁿ-kìⁿ.

4

In ê chún-chîn piàn tī thiⁿ-ē, In ê giân-gú kàu tī tōe-ke̍k. Siōng-tè tī in tiong-kan ūi-tio̍h jı̍t-thâu an-tì tiùⁿ-pâng.

5

Jı̍t-thâu chhin-chhiūⁿ sin-kiáⁿ-sài chhut i ê pâng, Ia̍h chhin-chhiūⁿ béng-ióng ê lâng hoaⁿ-hí cháu i ê lō͘.

6

I tùi thiⁿ ê chit-pêng chhut, Se̍h kàu thiⁿ ê hit-pêng; Bô chı̍t-hāng-mı̍h khǹg-ba̍t, bô tit-tio̍h i ê jia̍t-khì.

7

Iâ-hô-hoa ê lu̍t-hoat chiâu-chn̂g, ōe hō͘ lâng ê sim-sîn o̍ah--khí-lâi; Iâ-hô-hoa ê kan-chèng khak-sı̍t, ōe hō͘ gōng-lâng ū tì-hūi.

8

Iâ-hô-hoa ê kà-sī chèng-tı̍t, ōe hō͘ lâng ê sim hoaⁿ-hí; Iâ-hô-hoa ê bēng-lēng chheng-kiat, ōe hō͘ lâng ê ba̍k-chiu kng-bêng.

9

Keng-ùi Iâ-hô-hoa ê tō-lí sī chheng-khì, éng-óan chûn-chāi; Iâ-hô-hoa ê phòaⁿ-tòan chin-sı̍t, it-khài sī kong-gī.

10

Pí kim, pí chōe-chōe hó kim, khah thang him-bō͘; Pí bı̍t, pí phang-pâng tih--lo̍h-lâi ê bı̍t khah-tiⁿ.

11

Koh Lí ê lô͘-po̍k tùi chiah-ê siū kéng-kài; Siú chiah-ê ū tōa siúⁿ-sù.

12

Chī-chūi ōe chai i ê sit-chhò ah? Kiû Lí tû--khì góa àm-chīⁿ ê kè-sit.

13

Kiû Lí chó͘-chí Lí ê lô͘-po̍k, bô kò͘-ì hōan-chōe; M̄-chún hit ê chōe-ok kóan-hat góa; Góa chiū ôan-chôan, bián hōan tōa-chōe.

14

Iâ-hô-hoa góa ê chio̍h-pôaⁿ, kiù-sio̍k góa ê Chú ah; Gōan góa ê chhùi só͘ kóng--ê, sim só͘ siūⁿ--ê, tī Lí ê bīn-chêng tit-tio̍h chiap-la̍p.