Si-phian 第 20 章 - 巴克禮全羅

1

Tāi-pı̍t ê si; kau hō͘ Ga̍k-koaⁿ.1) Gōan Iâ-hô-hoa tī hōan-lān ê jı̍t thiaⁿ lí; Gōan Ngá-kok ê Siōng-tè ê miâ an-tì lí tī kôaiⁿ ê só͘-chāi;

2

Tùi sèng-só͘ pang-chān lí, Tùi Sek-an hû-chhî lí.

3

Kì-liām lí it-chhè só͘ hiàn--ê, Chiap-la̍p lí ê sio-chè. [Sè-la̍h

4

Chiàu lí ê sim só͘-ài-ê hō͘ lí, Chiâⁿ lí it-chhè ê kè-e̍k.

5

Góan beh in-ūi Lí ê kiù-un lâi chhiùⁿ-koa; Góan beh hōng góan ê Siōng-tè ê miâ lâi khiā-kî. Gōan Iâ-hô-hoa chiâⁿ lí it-chhè só͘ kiû--ê.

6

Taⁿ góa chai Iâ-hô-hoa kiù I siū-boah-iû--ê, Beh tùi I sèng ê thiⁿ thiaⁿ--i; Ēng i chiàⁿ-chhiú ê khùi-la̍t kiù i.

7

Ū lâng óa-khò chhia, ū lâng óa-khò bé; To̍k-to̍k góan beh kóng-khí Iâ-hô-hoa góan Siōng-tè ê miâ.

8

In phak-lo̍h po̍ah-tó; Góan chiū khí--lâi khiā chāi-chāi.

9

Kiû Iâ-hô-hoa chín-kiù; Góan kiû-kiò ê sî, gōan Ông thiaⁿ góan.