Si-phian 第 21 章 - 巴克禮全羅

1

Tāi-pı̍t ê si; kau hō͘ Ga̍k-koaⁿ.1) Iâ-hô-hoa ah, ông beh in-ūi Lí ê khùi-la̍t lâi hoaⁿ-hí. In-ūi Lí ê chín-kiù, i ê khòai-lo̍k cháiⁿ-iūⁿ ê tōa!

2

I ê sim só͘-ài--ê, Lí í-keng hō͘ i; I ê chhùi só͘ kiû--ê, Lí bô m̄ ún i. [Sè-la̍h

3

In-ūi Lí ēng tōa hok-khì ngiâ-chih i, Ēng hó-kim ê bián-liû tì tī i ê thâu-khak.

4

I tùi Lí kiû o̍ah-miā, Lí chiū hō͘ i; Chiū-sī tn̂g hè-siū kàu tī éng-óan.

5

I in-ūi Lí ê chín-kiù, ū tōa êng-kng; Lí koh chiong chun-kùi ui-giâm hē tī i ê sin-chiūⁿ.

6

Lí hō͘ i ū tōa hok-khì, kàu tī éng-óan; Koh hō͘ i tī Lí ê bīn-chêng hoaⁿ-hí khòai-lo̍k.

7

In-ūi ông óa-khò Iâ-hô-hoa; tī Chì-kôaiⁿ--ê ê chû-ài bô tì-kàu iô-choah.

8

Lí ê chhiú beh chhē-tio̍h Lí it-chhè ê tùi-te̍k; Lí ê chiàⁿ-chhiú beh chhē-tio̍h hiah ê òan-hūn Lí ê lâng.

9

Lí siū-khì ê sî, beh hō͘ in chhin-chhiūⁿ iām-jia̍t ê hé-lô͘; Iâ-hô-hoa beh tī I ê tōa siū-khì-tiong thun--in, Hé beh kā in sio-lio--khì.

10

Lí beh tùi sè-chiūⁿ châu-bia̍t in ê kiáⁿ-sun; Tùi lâng ê tiong-kan châu-bia̍t in ê hō͘-è.

11

In-ūi in ū ì-sù beh hāi Lí; In siat kè-bô͘, chóng-sī bōe chiâⁿ.

12

Lí beh hō͘ in o̍at-tńg-sin cháu, Lí beh khui keng, siā in ê bīn.

13

Iâ-hô-hoa ah, gōan Lí tùi Lí ê khùi-la̍t seng-kôaiⁿ; Án-ni góan beh gîm-si o-ló Lí ê tōa kôan-lêng.