Si-phian 第 24 章 - 巴克禮全羅

1

Tāi-pı̍t ê si.1) Tōe kap kî-tiong só͘ chhiong-móa ê, Sè-kài kap tiàm tī i tiong-kan ê, lóng sio̍k Iâ-hô-hoa.

2

I chiong tōe kiàn-lı̍p tī hái ê téng-bīn, An-tì tī tōa-chúi ê téng-bīn.

3

Chī-chūi ōe chiūⁿ Iâ-hô-hoa ê soaⁿ? Chī-chūi ōe khiā tī I sèng ê só͘-chāi?

4

Chiū-sī chhiú chheng-khì, sim chheng-kiat; Chûn-sim bô ǹg hu-ké, chiù-chōa bô khǹg kan-kúi ê lâng.

5

Chit-hō lâng beh tit-tio̍h Iâ-hô-hoa sù-hok; Koh tùi kiù i ê Siōng-tè tit-tio̍h gī.

6

Chiah-ê sī chhē Iâ-hô-hoa ê cho̍k-lūi, Ngá-kok ê Siōng-tè ah, che sī ài kìⁿ Lí ê bīn ê lâng. [Sè-la̍h

7

Siâⁿ-mn̂g ah, kia̍h-khí lín ê thâu; Éng-óan ê mn̂g ah, lín tio̍h siū kú-khí; Êng-kng ê Ông beh jı̍p.

8

Hit ê êng-kng ê Ông sī chī-chūi? Chiū-sī tōa khùi-la̍t tōa kôan-lêng ê Iâ-hô-hoa, Tī kau-chiàn ū tōa kôan-lêng ê Iâ-hô-hoa.

9

Siâⁿ-mn̂g ah, kia̍h-khí lín ê thâu, Éng-óan ê mn̂g ah, lín ia̍h tio̍h kia̍h-khí; Êng-kng ê Ông beh jı̍p.

10

Hit ê êng-kng ê Ông sī chī-chūi? Bān-kun ê Iâ-hô-hoa, I sī êng-kng ê Ông. [Sè-la̍h