Si-phian 第 35 章 - 巴克禮全羅

1

Tāi-pı̍t ê si.1) Iâ-hô-hoa ah, kap góa saⁿ-chiⁿ-ê, kiû Lí kap in saⁿ-chiⁿ; Kap góa kau-chiàn--ê, kiû Lí kap in kau-chiàn.

2

The̍h tōa-sòe ê tîn-pâi, Khí-lâi pang-chān góa.

3

Thiu-chhut chhiuⁿ, chó͘-chí hiah ê tui-kóaⁿ góa--ê; Tùi góa ê sîn-hûn kóng, Góa sī chín-kiù lí--ê.

4

Gōan hiah ê siàu-siūⁿ góa ê sìⁿ-miā ê lâng siū kiàn-siàu lêng-jio̍k; Gōan hiah ê kè-bô͘ hāi góa ê lâng o̍at-tò-tńg làu-khùi.

5

Gōan in chhin-chhiūⁿ hong chhe ê chho͘-khng; Ū Iâ-hô-hoa ê sù-chiá teh kóaⁿ in.

6

Gōan in ê lō͘ àm koh ku̍t, Ū Iâ-hô-hoa ê sù-chiá teh kóaⁿ in.

7

In-ūi in bô in-toaⁿ ūi góa àm-siat lô-bāng tī khiⁿ-lāi, Bô in-toaⁿ ku̍t hām-khiⁿ beh hāi góa ê sìⁿ-miā.

8

Gōan tī i bô phah-sǹg ê sî, chai-ē kàu i ê sin-chiūⁿ; Gōan i àm-siat ê lô-bāng tîⁿ-tio̍h i ka-kī; Gōan i po̍ah-lo̍h hí lāi-bīn, siū hāi.

9

Chiū góa ê sim beh tī Iâ-hô-hoa lâi khòai-lo̍k; Tī I ê kiù-un lâi hoaⁿ-hí.

10

Góa ê kut-thâu lóng beh kóng, Iâ-hô-hoa ah, chī-chūi ōe chhin-chhiūⁿ Lí? Lí chín-kiù khùn-khó͘ ê lâng, thoat-lī hiah ê pí i khah-kiông--ê; Chín-kiù khùn-khó͘ kap sòng-hiong ê lâng thoat-lī hiah ê chhiúⁿ-to̍at i--ê.

11

Hiong-ok ê kan-chèng--ê khí-lâi; Góa só͘ m̄-chai ê sū, in chhâ-mn̄g góa.

12

In tùi-tī góa ēng pháiⁿ pò hó: Hō͘ góa ê sîn-hûn ko͘-toaⁿ.

13

Lūn-kàu góa, tng in phòa-pīⁿ ê sî, góa chiū chhēng môa-saⁿ, Ēng kìm-chia̍h khek-khó͘ góa ê sim-sîn; Góa só͘ kiû--ê, lóng kui tī ka-kī ê sim-hôai.

14

Góa án-ni kiâⁿ, chhin-chhiūⁿ i sī góa ê pêng-iú, góa ê hiaⁿ-tī; Góa khut-lo̍h seng-khu pi-ai, chhin-chhiūⁿ lâng ūi-tio̍h lāu-bú ai-siong.

15

Góa tú-tio̍h hōan-lān, in chiū hoaⁿ-hí, saⁿ-kap chū-chı̍p; Góa só͘ m̄ saⁿ-bat ê hā-téng-lâng chū-chı̍p kong-kek góa; In khiú-la̍k góa bô soah.

16

In chhin-chhiūⁿ hì-hiauh, pián-chia̍h ê bô hē-lo̍h lâng, Tùi góa kā chhùi-khí-kun.

17

Chú ah, Lí tiāⁿ-tiāⁿ teh khòaⁿ, beh kàu jōa-kú? Kiû Lí kiù góa ê sîn-hûn thoat-lī in ê chân-hāi, Kiù góa ê sìⁿ-miā thoat-lī béng ê sai-á-thûn.

18

Góa tī tōa chū-hōe ê tiong-kan beh kám-siā Lí; Tī chèng peh-sìⁿ ê tiong-kan beh o-ló Lí.

19

Kiû Lí bo̍h-tit iông-ún hiah ê bô lí-iû tùi-te̍k góa-ê, tùi góa khoa-kháu; Bo̍h-tit iông-ún hiah ê bô in-toaⁿ òan-hūn góa-ê gîn--góa.

20

In-ūi in bô kóng hô-pêng ê ōe; Chiū-sī kè-bô͘ khúi-khiat ê ōe; hāi tōe-chiūⁿ an-hūn ê lâng.

21

In tōa-tōa khui-chhùi kong-kek góa; Kóng, Ho͘h--chāi! Ho͘h--chāi! Góan ê ba̍k-chiu í-keng khòaⁿ-kìⁿ lah.

22

Iâ-hô-hoa ah, Lí í-keng khòaⁿ-kìⁿ; kiû Lí m̄-thang chēng-chēng; Chú ah, m̄-thang lī-khui góa.

23

Góa ê Siōng-tè, góa ê Chú ah, kiû Lí cheng-sîn, khí--lâi; Phòaⁿ-koat góa ê sū, pān-lí góa ê àn.

24

Iâ-hô-hoa góa ê Siōng-tè ah, kiû Lí chiàu Lí ê kong-gī phòaⁿ-tòan góa; Bo̍h-tit iông-ún in tùi góa khoa-kháu.

25

Bo̍h-tit iông-ún in sim-lāi kóng, Ho͘h--chāi, chiàu góan ê sim-gōan lah; Bo̍h-tit iông-ún in kóng, Góan í-keng kā i thun--lo̍h-khì lah.

26

Gōan hiah ê hoaⁿ-hí góa tú-tio̍h hōan-lān--ê, lóng kiàn-siàu làu-khùi; Gōan hiah ê tùi góa ka-kī chun-tōa--ê, siū kiàn-siàu lak-lián.

27

Gōan hiah ê ài góa tit-tio̍h sin-oan ê lâng, chhut hoaⁿ-hí ê siaⁿ khòai-lo̍k; Gōan in siông-siông kóng, Tio̍h chun Iâ-hô-hoa chòe tōa. In-ūi I hoaⁿ-hí I ê lô͘-po̍k pêng-an.

28

Góa ê chı̍h beh kóng-khí Lí ê gī, Thong-jı̍t o-ló Lí.