Si-phian 第 36 章 - 巴克禮全羅

1

Iâ-hô-hoa ê lô͘-po̍k Tāi-pı̍t ê si, kau-hō͘ Gak-koaⁿ.1) Pháiⁿ-lâng ê chōe-kòa, ū ōe tī góa ê sim kóng, I ê ba̍k-chiu-tiong bô kiaⁿ Siōng-tè.

2

In-ūi tī i ê ba̍k-chiu-lāi i ka-kī thiám-mī, Phah-sǹg i ê chōe-ok éng bōe lō͘-hiān, bōe siū òan-hūn.

3

I chhùi-lāi ê ōe, lóng sī chōe-ok kap kan-chà; I kap tì-hūi hó ê só͘-kiâⁿ í-keng tōan-cho̍at.

4

I tī bîn-chhn̂g tô͘-bô͘ chōe-ok, I tiāⁿ-tio̍h ì-sù khiā tī m̄-hó ê lō͘; I bô òan-hūn pháiⁿ-tāi.

5

Iâ-hô-hoa ah, Lí ê chû-ài sī tī thiⁿ--nih; Lí ê sìn-sı̍t kàu tī kiong-chhong.

6

Lí ê gī chhin-chhiūⁿ ke̍k-kôaiⁿ ê soaⁿ; Lí ê phòaⁿ-tòan sī chhin-chhiūⁿ chhim-ian. Iâ-hô-hoa ah, lâng kap cheng-siⁿ, Lí lóng pó-hō͘ in.

7

Siōng-tè ah, Lí ê chû-ài cháiⁿ-iūⁿ hiah pó-pòe ah! Sè-kan-lâng bih tī Lí sı̍t-kó͘ ê tì-ìm-ē.

8

In beh in-ūi Lí ê chhù ê hó-mı̍h, tit-tio̍h pá-chiok; Lí ia̍h beh hō͘ in lim Lí khòai-lo̍k ê hô-chúi.

9

In-ūi o̍ah-miā ê gôan-thâu, chāi tī Lí hia; Tī Lí ê kng, góan beh khòaⁿ-kìⁿ kng.

10

Gōan Lí siông-siông si chû-ài hō͘ bat Lí ê lâng; Siông-siông ēng Lí ê kong-gī si hō͘ sim-lāi chèng-tı̍t ê lâng.

11

M̄-thang iông-ún kiau-ngō͘ ê lâng ê kha thún-ta̍h góa, M̄-thang iông-ún hiong-ok ê lâng ê chhiú kóaⁿ-tio̍k góa.

12

Tī-hia chòe pháiⁿ ê lâng í-keng tó--lo̍h-khì; I siū chhia-tó, bōe-ōe koh khí-lâi.