Si-phian 第 37 章 - 巴克禮全羅

1

Tāi-pı̍t ê si.1) M̄-thang in-ūi chòe pháiⁿ ê lâng, sim-lāi put-pêng; Ia̍h m̄-thang òan-tò͘ kiâⁿ put-gī ê lâng.

2

In-ūi in chhin-chhiūⁿ chháu khòai-khòai koah; Koh chhin-chhiūⁿ chhiⁿ-chhùi ê chhài láu--khì.

3

Tio̍h óa-khò Iâ-hô-hoa lâi kiâⁿ hó, Tiàm tī chit ê thó͘-tōe, ēng sêng-sı̍t chòe bí-niû.

4

Tio̍h lia̍h Iâ-hô-hoa chòe hoaⁿ-hí, I beh chiong lí ê sim só͘ kiû--ê hō͘ lí.

5

Tio̍h chiong lí ê tāi-chì kau-tài Iâ-hô-hoa; Koh óa-khò I, I beh hō͘ i chiâⁿ.

6

I beh hō͘ lí ê gī hoat-chhut chhin-chhiūⁿ kng; Lí ê phòaⁿ-tòan, chhin-chhiūⁿ tiong-tàu ê kng.

7

Tio̍h chēng-chēng tī Iâ-hô-hoa ê bīn-chêng, khoan-sim thèng-hāu I; M̄-thang in-ūi hit-hō sū-sū heng-thong-ê, Kap hit-hō pháiⁿ kè-bô͘ tit-tio̍h chiâⁿ--ê, lâi put-pêng.

8

Tio̍h soah siū-khì, lī-khui tōa siū-khì; M̄-thang put-pêng, kiaⁿ-liáu ōe chòe pháiⁿ.

9

In-ūi kiâⁿ-pháiⁿ ê lâng beh siū châu-bia̍t; To̍k-to̍k thèng-hāu Iâ-hô-hoa ê lâng, in beh sêng-chiap thó͘-tōe.

10

In-ūi koh tiap-á-kú, pháiⁿ-lâng beh bô--khì; Lí nā siông-sè chhâ i ê só͘-chāi, i ia̍h bô--khì;

11

To̍k-to̍k khiam-pi ê lâng beh sêng-chiap thó͘-tōe; In-ūi pêng-an hong-sēng tōa-tîm hoaⁿ-hí.

12

Pháiⁿ-lâng siat kè-bô͘ beh hāi gī-lâng, Koh ǹg i kā chhùi-khí-kun.

13

Chú beh chhiò i, In-ūi khòaⁿ-kìⁿ i ê jı̍t-chí beh kàu.

14

Pháiⁿ-lâng pu̍ih-to khui-keng, beh táⁿ-tó khùn-khó͘ sòng-hiong ê lâng; Beh thâi-sí kiâⁿ-chòe chèng-tı̍t ê lâng.

15

In ê to beh chhì-jı̍p ka-kī ê sim, In ê keng beh siū at-chı̍h.

16

Gī-lâng só͘-ū-ê chió-chió, Iâⁿ-kè chōe-chōe pháiⁿ-lâng ê pù-ū.

17

In-ūi pháiⁿ-lâng ê chhiú beh siū at-chı̍h; To̍k-to̍k Iâ-hô-hoa hû-chhî gī ê lâng.

18

Iâ-hô-hoa chai ôan-chôan ê lâng ê sî-jı̍t; In ê sán-gia̍p beh éng-óan tī-teh.

19

In tī hōan-lān ê sî put-tì kiàn-siàu; Tī ki-hng ê jı̍t beh tit-tio̍h pá-chiok.

20

Chóng-sī pháiⁿ-lâng beh bia̍t-bô, Iâ-hô-hoa ê tùi-te̍k beh chhin-chhiūⁿ chháu-po͘ ê bō͘-sēng; In beh siau-bô chhin-chhiūⁿ hé-hun ê siau-bô.

21

Pháiⁿ-lâng kā lâng chioh, iā bô hêng; Nā-sī gī-lâng kiâⁿ lîn-bín, siá-si lâng.

22

Iâ-hô-hoa sù-hok ê lâng, in beh sêng-chiap thó͘-tōe; Hō͘ I chiù-chó͘ ê lâng beh siū bia̍t-bô.

23

Gī-lâng ê kha-pō͘ sī Iâ-hô-hoa só͘ an-tì; Koh I hoaⁿ-hí i ê lō͘.

24

I sui-bóng po̍ah-tó, ia̍h bô kàu kui-sin siak--lo̍h-khì; In-ūi Iâ-hô-hoa ēng I ê chhiú hû i.

25

Góa chêng siàu-liân, taⁿ nî lāu; Chóng-sī bē-bat khòaⁿ-kìⁿ gī-lâng siū pàng-sak, Ia̍h i ê hō͘-è chòe khit-chia̍h.

26

I thong-jı̍t lîn-bín lâng, chioh lâng, I ê hō͘-è tit-tio̍h hok-khì.

27

Lí tio̍h lī-khui pháiⁿ, kiâⁿ hó, Chiah thang éng-óan khiā-khí.

28

In-ūi Iâ-hô-hoa hoaⁿ-hí kong-pêng, Bô pàng-sak I sèng ê peh-sìⁿ; In éng-óan siū pó-hō͘, To̍k-to̍k pháiⁿ-lâng ê hō͘-è beh siū châu-bia̍t.

29

Gī-lâng beh sêng-chiap thó͘-tōe, Éng-óan tiàm tī-hia.

30

Gī-lâng ê chhùi kóng tì-hūi, I ê chı̍h tâm-lūn kong-pêng.

31

I ê Siōng-tè ê lu̍t-hoat tī i ê sim-lāi; I ê kha lóng bōe ta̍h-thu̍t.

32

Pháiⁿ-lâng thau-khòaⁿ gī-lâng, Siàu-siūⁿ thâi--i.

33

Iâ-hô-hoa bô pàng-sak i tī pháiⁿ lâng ê chhiú; Tng sím-phòaⁿ ê sî, ia̍h bô tēng i ê chōe.

34

Lí tio̍h thèng-hāu Iâ-hô-hoa chun-siú I ê tō-lō͘; I chiū ko-seng lí, hō͘ lí sêng-chiap thó͘-tōe; Pháiⁿ-lâng siū châu-bia̍t ê sî, lí beh khòaⁿ-kìⁿ.

35

Góa bat khòaⁿ-kìⁿ pháiⁿ-lâng ū tōa sè-le̍k, Koh hoat-ta̍t chhin-chhiūⁿ ām ê chhiū tī i ê pún thó͘-tōe.

36

Ū lâng tùi hia keng-kè, khòaⁿ ah, i bô--khì lah; Góa ia̍h chhē i, chhē bōe tio̍h.

37

Lí tio̍h siông-sè khòaⁿ hit ê ôan-chôan ê lâng, khòaⁿ hit ê chèng-tı̍t ê lâng, In-ūi hô-pêng ê lâng ū hó ê kiat-kio̍k.

38

Lūn-kàu hōan-hoat ê lâng, beh chòe-chı̍t-ē bia̍t-bô; Pháiⁿ-lâng ê kiat-kio̍k beh siū châu-bia̍t.

39

Chóng-sī gī-lâng tit-tio̍h kiù, sī tùi Iâ-hô-hoa; Tng hōan-lān ê sî, I chòe in ê iâⁿ-chē.

40

Iâ-hô-hoa pang-chān in, chín-kiù in; I chín-kiù in thoat-lī pháiⁿ-lâng, lâi khan-kiù in; In-ūi in óa-khò I.