Si-phian 第 44 章 - 巴克禮全羅

1

Khó-la̍h hō͘-è kà-sī ê si, kau hō͘ Ga̍k-koaⁿ.1) Siōng-tè ah, Lí tī kó͘-chá, góan ê lia̍t-chó͘ ê sî, só͘ kiâⁿ ê sū, góan chhin-hī thiaⁿ-kìⁿ, Góan ê lia̍t-chó͘ ia̍h ū tùi góan kóng-khí.

2

Lí bat ēng Lí ê chhiú kóaⁿ lia̍t-pang, lâi chai-pôe góan ê lia̍t-chó͘, Lí khó͘-chhó͘ hiah ê cho̍k, lâi hō͘ in hoat-ta̍t.

3

In-ūi in m̄-sī tùi in ê to-kiàm lâi tit-tio̍h thó͘-tōe; Ia̍h m̄-sī in ê chhiú kiù in; Chiū-sī Lí ê chiàⁿ-chhiú, Lí ê chhiú-kut, Lí ê bīn ê kng kiù in; In-ūi Lí hoaⁿ-hí in.

4

Siōng-tè ah, Lí sī góa ê Ông; Kiû Lí chhut lēng, chín-kiù Ngá-kok.

5

Góan óa-khò Lí, beh chhia-tó góan ê tùi-te̍k; Góan óa-khò Lí ê miâ, beh thún-ta̍h hiah ê khí-lâi kong-kek góan ê lâng.

6

In-ūi góa bô beh óa-khò góa ê keng, Góa ê to ia̍h bōe kiù góa.

7

To̍k-to̍k Lí bat kiù góan thoat-lī tùi-te̍k, Hō͘ òan-hūn góan ê lâng kiàn-siàu.

8

Góan thong-jı̍t in-ūi Siōng-tè lâi khoa-kháu, Góan beh o-ló Lí ê miâ kàu éng-óan. [Sè-la̍h

9

Chóng-sī hiān-kim Lí pàng-sak góan, hō͘ góan siū lêng-jio̍k; Bô kap góan ê kun-peng saⁿ-kap chhut-khì.

10

Lí hō͘ góan tī tùi-te̍k ê bīn-chêng o̍at-tńg-sin cháu; Hiah ê òan-hūn góan ê lâng, chhut-chāi in lâi chhiúⁿ-the̍h.

11

Lí hō͘ góan chhin-chhiūⁿ iûⁿ chòe lâng ê chia̍h-mı̍h; Hō͘ góan sì-sòaⁿ tī lia̍t-pang tiong.

12

Lí bōe Lí ê peh-sìⁿ, ia̍h bô thàn-chîⁿ, só͘ tit-tio̍h ê kè-chîⁿ, iā bô ke-thiⁿ Lí ê hó-gia̍h.

13

Lí hō͘ góan siū keh-piah kok ê lêng-jio̍k; Siū sì-ûi ê lâng thí-chhiò ki-chhì.

14

Lí hō͘ góan tī lia̍t-pang-tiong chòe ōe-pìⁿ; Hō͘ chèng peh-sìⁿ tùi góan iô-thâu.

15

Góa ê lêng-jio̍k thong-jı̍t tī góa ê thâu-chêng; Góa ê bīn ê kiàn-siàu jia-khàm góa;

16

Sī in-ūi hit ê lóe-mē, húi-pòng ê lâng ê siaⁿ, Koh in-ūi tùi-te̍k kap pò-oan ê lâng ê iân-kò͘.

17

Chiah-ê lóng lîm-kàu góan, góan bô bōe-kì-tit Lí. Ia̍h bô ké-iáⁿ siú Lí ê iok.

18

Góan ê sim bô pōe Lí; Góan ê kha-pō͘ bô phian-lī Lí ê lō͘.

19

Lí kéng-jiân tī soaⁿ-káu ê só͘-chāi teh-siong góan, Ēng sí ê ìm-ńg jia-khàm góan.

20

Siat-sú góan bōe-kì-tit góan ê Siōng-tè ê miâ, Á-sī ǹg pa̍t ê sîn kia̍h-khí chhiú;

21

Siōng-tè kiám bô kàm-chhat chit ê sū mah? In-ūi I chai lâng sim-lāi ê ún-ba̍t.

22

Góan in-ūi Lí ê iân-kò͘, thong-jı̍t siū thâi; Khòaⁿ chòe chhin-chhiūⁿ beh thâi ê iûⁿ.

23

Chú ah, kiû Lí cheng-sîn, siáⁿ-sū teh khùn? Kiû Lí khí--lâi, m̄-thang éng-óan khì-sak góan.

24

Lí siáⁿ-sū ng Lí ê bīn? Siáⁿ-sū bōe-kì-tit góan só͘ siū ê khó͘-lān kap ap-chè?

25

In-ūi góan ê sìⁿ-miā phak tī thô͘-hún; góan ê pak-tó͘ liâm tī tōe-bīn.

26

Kiû Lí khí-lâi pang-chān góan, Tài-liām Lí ê chû-ài kiù-sio̍k góan.