Si-phian 第 45 章 - 巴克禮全羅

1

Khó-la̍h hō͘-è kà-sī ê si, koh sī ài-bō͘ ê koa; kau hō͘ Ga̍k-koaⁿ; tiāu, sī ēng "Pek-ha̍p-hoe".1) Góa ê sim chhèng-chhut hó ê ōe; Góa kóng-khí góa ūi-tio̍h ông só͘ chòe--ê; Góa ê chı̍h sī bín-chia̍t ê lâng ê pit.

2

Lí pí sè-kan lâng khah hó-khòaⁿ, Tī lí ê chhùi móa-móa ū un-hūi, Só͘-í Siōng-tè sù-hok lí, tı̍t-kàu éng-óan.

3

Tōa kôan-lêng--ê ah, lí tio̍h pē kiàm tī io--nih, Hián-chhut lí ê êng-kng kap ui-giâm.

4

Koh tī ui-giâm ê tiong-kan, ūi-tio̍h chin-lí, khiam-pi, kong-gī, Lí chē-chhia chìn-chêng khì, bô m̄ tek-sèng; Lí ê chiàⁿ-chhiú beh chòe thang kiaⁿ ê sū, hō͘ lí khòaⁿ.

5

Lí ê chìⁿ-bah chin lāi, Siā-tio̍h ông ê tùi-te̍k ê sim, Lia̍t-pang tó tī lí ê ē-bīn.

6

Siōng-tè ah, Lí ê pó-chō sī éng-éng óan-óan ê, Lí ê kok ê kôan-pèng sī chèng-tı̍t ê kôan-pèng.

7

Lí hoaⁿ-hí kong-gī, òan-hūn put-hoat, Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ.

8

Lí ê i-chiûⁿ lóng ū bu̍t-io̍h, tîm-hiuⁿ, jio̍k-kùi ê phang; Tùi chhiūⁿ-gê ê ông-kiong, ū si-hiân ê ga̍k-khì hō͘ lí hoaⁿ-hí.

9

Ū ông ê cha-bó͘-kiáⁿ tī lí chun-kùi hū-lú ê tiong-kan; Ông-hō͘ ēng Gô-hui ê kim chng-thāⁿ, khiā tī lí ê chiàⁿ-pêng.

10

Cha-bó͘-gín-á ah, lí tio̍h thiaⁿ, tio̍h khòaⁿ, tio̍h àⁿ hī-khang; M̄-thang kì-tit lí ê peh-sìⁿ, kap lí ê lāu-pē ê ke;

11

Ông chiū beh him-bō͘ lí ê súi; In-ūi i sī lí ê chú, lí tio̍h pài i.

12

Chhui-lô ê peh-sìⁿ beh lâi sàng lé-mı̍h, Peh-sìⁿ tiong ê hó-gia̍h lâng beh tùi lí kiû un.

13

Ông ê cha-bó͘-kiáⁿ tī ông-kiong-lāi, ke̍k-kî êng-hôa; I ê i-ho̍k sī ēng kim-sòaⁿ siù--ê.

14

I beh chhēng siù-hoe ê i-ho̍k, siū chhōa kàu ông ê bīn-chêng; Chòe-phōaⁿ kun-sûi i ê chāi-sek-lú ia̍h beh siū chhōa kàu lí ê bīn-chêng;

15

In beh hoaⁿ-hí khòai-lo̍k siū ín-chhōa; In beh chìn-jı̍p ông-kiong.

16

Lí ê kiáⁿ-sun beh sòa-chiap lí ê lia̍t-chó͘; Lí beh siat-lı̍p in tī chôan-tōe chòe-ông.

17

Góa beh hō͘ lí ê miâ bān-tāi hō͘ lâng kì-liām; Só͘-í bān peh-sìⁿ beh éng-éng óan-óan kám-siā lí.