Si-phian 第 5 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ; ēng pûn ê ga̍k-khì.1) Iâ-hô-hoa ah, kiû Lí àⁿ hī-khang thiaⁿ góa ê ōe. Kàm-chhat góa ê sim-su.

2

Góa ê Ông, góa ê Siōng-tè ah, Kiû Lí àⁿ-lo̍h thiaⁿ góa kiû-kiò ê siaⁿ: In-ūi góa ǹg Lí kî-tó.

3

Iâ-hô-hoa ah, chá-khí-sî Lí ōe thiaⁿ góa ê siaⁿ; Chá-khí-sî góa beh tùi Lí pâi-lia̍t góa ê sim-ì, sòa beh liâu-bāng.

4

In-ūi Lí m̄-sī hoaⁿ-hí chōe-ok ê Siōng-tè; Pháiⁿ--ê bōe-tit-thang kap Lí tâng khiā-khí.

5

Kiau-ngō͘ ê lâng bōe-ōe khiā tī Lí ê bīn-chêng; Chòe-pháiⁿ ê lâng lóng sī Lí só͘ òan-hūn.

6

Kóng pe̍h-chha̍t--ê, Lí beh bia̍t in; Ài thâi lâng kap kan-kúi--ê, lóng sī Iâ-hô-hoa só͘ iàm-ò͘ⁿ.

7

Lūn-kàu góa, góa beh pîn Lí hong-sēng ê chû-ài jı̍p Lí ê chhù; Góa beh chûn kèng-ùi Lí ê sim, ǹg Lí ê sèng-tiān lâi kèng-pài.

8

Iâ-hô-hoa ah, kiû Lí in-ūi góa ê tùi-te̍k, pîn Lí ê kong-gī chhōa góa; Hō͘ Lí ê lō͘ tī góa ê bīn-chêng chèng-tı̍t.

9

In-ūi in ê chhùi bô láu-sı̍t; In ê sim ok-to̍k móa-móa; In ê nâ-âu sī khui-khui ê bōng; In ēng chı̍h thiám-mī lâng.

10

Siōng-tè ah, kiû Lí tēng in ê chōe; Hō͘ in tùi ka-kī ê kè-bô͘ po̍ah-tó. In ê chōe-kòa chin-chōe, gōan Lí chiong in kóaⁿ-chhut; In-ūi in pōe-pōan Lí.

11

Kìⁿ-nā óa-khò Lí--ê, gōan in hoaⁿ-hí; Gōan in éng-éng hoaⁿ-hí chhut-siaⁿ; in-ūi Lí pì-iū in. Koh gōan hiah ê thiàⁿ-sioh Lí ê miâ ê lâng, lóng tiàm-tī Lí lâi hoaⁿ-hí.

12

In-ūi Lí beh sù-hok hō͘ gī-lâng; Iâ-hô-hoa ah, Lí beh ēng un-hūi, chhin-chhiūⁿ tîn-pâi, sì-bīn ûi--i.