Si-phian 第 4 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ; ēng si hiân ê ga̍k-khì.1) Hián-bêng góa ê gī ê Siōng-tè ah, góa kiû-kiò ê sî, kiû Lí ìn góa. Góa tī khùn-khó͘ ê tiong-kan, Lí bat hō͘ góa khoan-khoah. Taⁿ kiû Lí lîn-bín góa, lâi thiaⁿ góa ê kî-tó.

2

Lín chiah ê siōng-téng-lâng ah, chiong góa ê êng-kng piàn-chòe lêng-jio̍k, beh kàu tī-sî? Lín ì-ài khang-hu, chhiau-chhē bô iáⁿ-chiah, beh kàu tī-sî? [Sè-la̍h

3

Lín tio̍h chai Iâ-hô-hoa í-keng hun-piat kèng-khiân ê lâng chòe I ka-kī ê. Góa kiû-kiò Iâ-hô-hoa, I beh thiaⁿ góa.

4

Lín tio̍h kiaⁿ-hiâⁿ, m̄-thang hōan-chōe; Tī bîn-chhn̂g--nih, sim tio̍h sàm-su, ia̍h tio̍h siok-chēng. [Sè-la̍h

5

Tio̍h hiàn gī ê chè, Ia̍h tio̍h óa-khò Iâ-hô-hoa.

6

Chōe-chōe lâng kóng, Chī-chūi ōe chí-sī góan sím-mı̍h hó--chhù? Iâ-hô-hoa ah, kiû Lí ēng Lí ê bīn ê kng lâi chiò góan.

7

Lí hō͘ góa sim-lāi ū hoaⁿ-hí, Iâⁿ-kè lâng tit-tio̍h chōe-chōe gō͘-kak kap sin-chiú ê sî.

8

Góa beh an-jiân tó--teh khùn, In-ūi chí-ū Iâ-hô-hoa Lí hō͘ góa an-ún khiā-khí.