Si-phian 第 51 章 - 巴克禮全羅

1

Tāi-pı̍t kap Po̍at-sī-pa tâng-pâng í-āu, sian-ti Ná-tan lâi kìⁿ i, i chòe chit ê si; kau hō͘ Ga̍k-koaⁿ.1) Siōng-tè ah, chiàu Lí ê chû-ài lîn-bín góa; Chiàu Lí hong-sēng ê chû-pi chhat-siau góa ê kè-sit;

2

Chiong góa ê chōe-ok it-chīn sóe-tû, Ia̍h sóe-chheng góa, kàu bô chōe.

3

In-ūi góa ka-kī chai góa ê kè-sit; Góa ê chōe siông-siông tī góa ê bīn-chêng.

4

Góa só͘ hōan-tio̍h--ê, chiū-sī tek-chōe Lí nā-tiāⁿ, Tī Lí ê ba̍k-chiu-chêng kiâⁿ chit-hō pháiⁿ; Tì-kàu Lí kóng-ōe ê sî, hián-bêng chòe-gī; Phòaⁿ-tòan ê sî, hián-bêng kong-tō.

5

Góa sī tī chōe-ok-tiong siⁿ--ê, Tī chōe ê tiong-kan, góa ê lāu-bú hôai-īn góa.

6

Lí só͘ ài--ê sī sim-lāi sêng-sı̍t; Tī góa ê pak-lāi, Lí beh hō͘ góa tit-tio̍h tì-hūi.

7

Kiû Lí ēng giû-chhek-chháu sóe góa, góa chiū chheng-khì; Kiû Lí sóe góa, góa chiū pí seh khah-pe̍h.

8

Kiû Lí hō͘ góa tit-tio̍h thiaⁿ-kìⁿ hoaⁿ-hí khòai-lo̍k ê siaⁿ; Hō͘ Lí só͘ at-chı̍h ê kut thang hoaⁿ-hí.

9

Kiû Lí ng Lí ê bīn, bô khòaⁿ góa ê chōe, Chhat-siau góa it-chhè ê chōe-ok.

10

Siōng-tè ah, kiû Lí kā góa chhòng-chō chheng-khì ê sim, Hō͘ góa ê lāi-bīn ū ōaⁿ-sin chèng-tı̍t ê sîn.

11

M̄-thang kóaⁿ góa, hō͘ góa lī-khui Lí ê bīn; M̄-thang tùi góa siu-hôe Lí sèng ê sîn.

12

Kiû Lí hō͘ góa iû-gôan tit-tio̍h Lí kiù-un ê khòai-lo̍k; Siúⁿ-sù góa ū chū-iû ê sîn, lâi hû-chhî góa.

13

Góa chiū chiong Lí ê tō-lō͘ chí-sī ū kè-sit ê lâng; Ū chōe ê lâng chiū beh kui-sūn Lí.

14

Siōng-tè ah, Lí sī kiù góa ê Siōng-tè, Kiû Lí kiù góa thoat-lī thâi-lâng ê chōe; Góa ê chı̍h beh tōa-siaⁿ gîm-si o-ló Lí ê gī.

15

Chú ah, kiû Lí khui góa ê chhùi-tûn; Góa ê chhùi chiū beh pò-iông Lí ê hó miâ-siaⁿ.

16

In-ūi Lí bô ài chè-mı̍h; nā ài, góa chiū beh hiàn; Sio-chè Lí ia̍h bô hoaⁿ-hí.

17

Siōng-tè só͘ ài ê chè, chiū-sī iu-siong ê sîn; Siōng-tè ah, iu-siong thòng-hóe ê sim, Lí bô beh khòaⁿ-khin i.

18

Kiû Lí chiàu Lí ê hó ì-sù, hó khóan-thāi Sek-an; Khí-chō Iâ-lō͘-sat-léng ê siâⁿ-chhiûⁿ.

19

Hit-sî Lí beh hoaⁿ-hí gī ê chè, kap sio-chè, í-kı̍p ka-nn̂g-chiah cheng-siⁿ ê sio-chè; Hit-sî lâng beh chiong kang ê gû hiàn tī Lí ê tôaⁿ.