Si-phian 第 57 章 - 巴克禮全羅

1

Tāi-pı̍t siám-pī Sò-lô, bih tī tōng-lāi; hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hōai--ê".1) Siōng-tè ah, kiû Lí khó-lîn góa, khó-lîn góa; Góa ê sin beh tâu-hioh tī Lí; Góa beh tâu-hioh tī Lí sı̍t-kó͘ ê tì-ìm-ē, Thèng-hāu chiah ê chai-ē keng-kè.

2

Góa beh kiû-kiò Chì-kôaiⁿ ê Siōng-tè; Chiū-sī kā góa chhiâⁿ-tî ta̍k-hāng sū ê Siōng-tè.

3

Tng hit ê beh thun-chia̍h góa ê lâng húi-pòng góa ê sî, Siōng-tè beh si-un, tùi thiⁿ kiù góa; [Sè-la̍h Ia̍h beh hoat-chhut I ê chû-ài, kap I ê sêng-sı̍t.

4

Góa ê sìⁿ-miā tī sai ê tiong-kan; Góa tó tī chhin-chhiūⁿ hé to̍h ê sè-kan lâng ê tiong-kan; In ê chhùi-khí sī chhiuⁿ sī chìⁿ, In ê chı̍h sī lāi-to.

5

Siōng-tè ah, gōan Lí kôaiⁿ-tōa pôaⁿ-kè chiah ê thiⁿ, Gōan Lí ê êng-kng pôaⁿ-kè chôan-tōe.

6

In kā góa ê kha-pō͘ siat lô-bāng, Ap-chè góa ê sim-sîn; In tī góa ê bīn-chêng khui hām-khiⁿ, Ka-kī hóan-tńg po̍ah-lo̍h hit lāi-bīn. [Sè-la̍h

7

Siōng-tè ah, góa ê sim chū-chāi, góa ê sim chū-chāi; Góa beh gîm-si, góa beh chhiùⁿ-koa o-ló.

8

Góa ê sîn ah, lí tio̍h cheng-sîn khí-lâi; Khîm ah, sek ah, lín tio̍h cheng-sîn khí-lâi; Góa pún-sin beh chin chá cheng-sîn khí-lâi.

9

Chú ah, Góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí.

10

In-ūi Lí ê chû-ài tōa kàu tú-thiⁿ, Lí ê sêng-sı̍t kàu kiong-chhong.

11

Siōng-tè ah, gōan Lí kôaiⁿ-tōa pôaⁿ-kè chiah ê thiⁿ; Gōan Lí ê êng-kng pôaⁿ-kè chôan-tōe.