Si-phian 第 58 章 - 巴克禮全羅

1

Tāi-pı̍t kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hōai".1) Sè-kan lâng ah, lín chēng-chēng kiám chin-chiàⁿ kóng kong-gī mah? Lín kiám chiàu sêng-sı̍t kiâⁿ sím-phòaⁿ mah?

2

M̄-sī, lín sī sim-lāi chòe pháiⁿ; Lín tī tōe-chiūⁿ, ēng lín ê chhiú só͘ chòe ê kiông-pō, chhìn hō͘ lâng.

3

Pháiⁿ-lâng chı̍t-ē chhut bú-thai, chiū kap Siōng-tè chhiⁿ-so͘; Chı̍t-ē lī-khui lāu-bú ê pak-tó͘, chiū kiâⁿ chha-lō͘, kóng pe̍h-chha̍t ōe.

4

In ê to̍k chhin-chhiūⁿ chôa ê to̍k, In chhin-chhiūⁿ chhàu-hī-lâng ê to̍k-chôa that-ba̍t hī-khang;

5

M̄-thiaⁿ khu-chôa ê lâng ê siaⁿ, Sui-bóng gâu ūi-hû liām-chiù--ê, in ia̍h m̄-thiaⁿ.

6

Siōng-tè ah, kiû Lí phah-chı̍h in chhùi-lāi ê khí; Iâ-hô-hoa ah, kiû Lí phah-chı̍h sai-á-thûn ê tōa ki chhùi-khí.

7

Gōan in siau-bia̍t chhin-chhiūⁿ kín-kín lâu ê chúi; In ê chìⁿ pí beh siā ê sî, gōan in ê chìⁿ chhin-chhiūⁿ phah-chı̍h.

8

Gōan in chhin-chhiūⁿ lô͘-lê, siau-iûⁿ--khì; Koh chhin-chhiūⁿ hū-jîn-lâng ka-la̍uh bô kìⁿ-tio̍h thiⁿ-jı̍t ê thai.

9

Lín ēng chhì-á hiâⁿ hé, tiáⁿ iáu-bē jia̍t, I beh ēng kńg-lê-hong, chiong chhiⁿ--ê kap to̍h--ê, chòe chı̍t-ē sàu--khì.

10

Gī-lâng khòaⁿ-kìⁿ pò-èng ê sū, chiū hoaⁿ-hí; I beh tī pháiⁿ-lâng ê huih sóe i ê kha.

11

Lâng chiū beh kóng, Gī-lâng chin-chiàⁿ ū hó-pò; Tī tōe-bīn-chiūⁿ kó-jiân ū Siōng-tè teh phòaⁿ-tòan.