Si-phian 第 60 章 - 巴克禮全羅

1

Tāi-pı̍t tī nn̄g-tiâu khoe ê A-lân, í-kı̍p Só-pa ê A-lân, kau-chiàn ê sî, Iok-ap tò-lâi tī Iâm-kok, thâi-sí Í-tong lâng chı̍t-bān nn̄g-chheng, hit-sî Tāi-pı̍t chòe chit ê kim ê si, hō͘ lâng ha̍k-sı̍p; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Siōng-tè ah, Lí bat khì-sak góan, phò-hōai góan; Lí bat siū-khì góan, kiû Lí hō͘ góan koh heng-khí.

2

Lí hō͘ tōe tín-tāng, ia̍h hō͘ i pang-lı̍h; Gōan Lí i-hó i ê lı̍h-hûn; in-ūi tōe iô-tāng.

3

Lí hō͘ Lí ê peh-sìⁿ tú-tio̍h kan-lân; Lí hō͘ góan lim hit ê hō͘ lâng tian-lâi tó-khì ê chiú.

4

Lí ēng kî siúⁿ-sù kèng-ùi Lí ê lâng, Thang ūi chin-lí kia̍h--khí-lâi ia̍t. [Sè-la̍h

5

Kiû Lí thiaⁿ góan, ēng chiàⁿ-chhiú khan-kiù góan, Thang hō͘ Lí só͘ thiàⁿ ê lâng tit-tio̍h kiù.

6

Siōng-tè í-keng kí I ê sèng-kiat lâi kóng, Góa beh tāi-ia̍t, Góa beh pun-khui Sī-kiàm, niû So͘-kat ê soaⁿ-kok.

7

Ki-lia̍t sī Góa-ê, Má-ná-se ia̍h sī Góa-ê; Í-hoat-liân sī Góa ê thâu-khoe; Iû-tāi sī Góa ê kôan-pèng.

8

Mô͘-ap beh chòe Góa ê e̍k-phûn; Góa beh hiat Góa ê ôe tī Í-tong; Hui-lī-sū tōe ah, lí in-ūi Góa lâi tōa-siaⁿ hoah.

9

Chī-chūi ōe chhōa góa jı̍p kian-kò͘ ê siâⁿ? Chī-chūi chhōa góa jı̍p Í-tong ê tōe?

10

Siōng-tè ah, Lí kiám m̄-sī khì-sak góan mah? Siōng-tè ah, Lí bô kap góan ê kun-peng saⁿ-kap chhut-khì.

11

Kiû Lí pang-chān góan kong-kek tùi-te̍k; In-ūi lâng ê chín-kiù sī khang-khang.

12

Góan óa-khò Siōng-tè, chòe-chiâⁿ tōa tāi-chì; In-ūi thún-ta̍h góan ê tùi-te̍k--ê, chiū-sī I.