Si-phian 第 7 章 - 巴克禮全羅

1

Tāi-pı̍t chí Piān-ngá-bín lâng Kó͘-sı̍t ê ōe, ǹg Iâ-hô-hoa chhiùⁿ-koa; tiāu, ēng Si-kai-un.1) Iâ-hô-hoa góa ê Siōng-tè ah, góa óa-khò Lí; Kiû Lí kiù góa thoat-lī it-chhè tui-kóaⁿ góa ê lâng, kiù góa chhut-lâi.

2

Kiaⁿ-liáu i chhin-chhiūⁿ sai, thiah-lı̍h góa; Thiah kàu chhùi-chhùi, bô chín-kiù góa--ê.

3

Iâ-hô-hoa góa ê Siōng-tè ah, góa nā kiâⁿ chit-ê; Nā ū chōe-ok tī góa ê chhiú;

4

Góa nā ēng pháiⁿ pò hit ê kap góa hô-hó ê lâng; (Kî-sı̍t liân hit ê bô iân-kò͘ kap góa chòe tùi-te̍k ê lâng, góa ia̍h ū kiù i;)

5

Chiū chhut-chāi tùi-te̍k tui-jip góa, kàu jip-tio̍h; Chiong góa ê sìⁿ-miā ta̍h tī thô͘-kha, Chiong góa ê êng-kng hē tī thô͘-hún. [Sè-la̍h

6

Iâ-hô-hoa ah, kiû Lí tī Lí ê siū-khì-tiong khí--lâi, Peh--khí-lâi khiā, tí-tng góa ê tùi-te̍k ê tōa siū-khì, Kiû Lí ūi-tio̍h góa lâi chhíⁿ, chiàu Lí só͘ tiāⁿ-tio̍h lâi sím-phòaⁿ.

7

Gōan lia̍t-pang ê hōe ûi Lí; Gōan Lí tò-tńg tī kôaiⁿ-ūi tī in ê téng-bīn.

8

Iâ-hô-hoa sím-phòaⁿ chèng peh-sìⁿ; Iâ-hô-hoa ah, kiû Lí phòaⁿ-tòan góa, chiàu góa ê gī kap góa sim-lāi ê chèng-tı̍t.

9

Gōan pháiⁿ-lâng ê pháiⁿ kàu chia soah, gī-lâng Lí hō͘ i khiā-chāi; In-ūi kong-gī ê Siōng-tè kàm-chhat lâng ê sim-tn̂g.

10

Góa ê tîn-pâi chāi-tī Siōng-tè, I chín-kiù sim-lāi chèng-tı̍t ê lâng.

11

Siōng-tè sī kong-gī ê sím-phòaⁿ-si; Ia̍h sī jı̍t-jı̍t hoat-chhut siū-khì ê Siōng-tè.

12

Lâng nā m̄ hóan-hóe, I beh bôa I ê to; I ū tiuⁿ I ê keng, pī-pān piān-piān.

13

I pī-pān ōe hō͘ lâng sí ê ke-si, I só͘ siā ê chìⁿ sī hé chìⁿ.

14

Lí khòaⁿ, pháiⁿ lâng tô͘-bô͘ kan-ok, Hôai-īn to̍k-hāi, siⁿ-chhut hu-ké.

15

I khui khut, ku̍t hō͘ i chhim; Kéng-jiân po̍ah-lo̍h tī i só͘ khui ê hām-khiⁿ.

16

I ê to̍k-hāi beh tò-tńg kàu i ê thâu-khak; I ê kiông-pō beh lo̍h tī i ê thâu-khak-téng.

17

Góa beh chiàu Iâ-hô-hoa ê kong-gī kám-siā I; Koh o-ló chì-kôaiⁿ Iâ-hô-hoa ê miâ.