Si-phian 第 8 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ, ēng Ka-te̍k ê ga̍k-khì;1) Iâ-hô-hoa góan ê Chú ah, Lí ê miâ tī chôan-tōe kàu chiah kôaiⁿ-tōa! Lí chiong Lí ê êng-kng pâi-siat tī thiⁿ--nih.

2

Lí in-ūi Lí ê tùi-te̍k ê iân-kò͘, tùi eⁿ-á kap chia̍h-leng--ê ê chhùi, kiàn-lı̍p lêng-le̍k; Beh hō͘ tùi-te̍k kap pò-oan--ê chēng-chēng.

3

Góa khòaⁿ Lí ê thiⁿ, Lí ê chhiú só͘ chō--ê, Kap Lí só͘ pâi-lia̍t ê ge̍h kap chhiⁿ;

4

Sè-kan lâng sī sím-mı̍h, Lí siàu-liām i? Lâng ê kiáⁿ sī sím-mı̍h, Lí kòan-kò͘--i?

5

Lí hō͘ i pí thiⁿ-sài lî-á khah-su, Koh siúⁿ-sù i êng-kng chun-kùi chòe bián-liû.

6

Lí siat-lı̍p i kóan-lí Lí ê chhiú só͘ chō--ê, Hē bān-mı̍h tī i ê kha-ē;

7

Chiū-sī it-chhè ê iûⁿ kap gû, Soaⁿ-iá ê cháu-siù;

8

Thiⁿ-tiong ê chiáu, hái-lāi ê hî, Kap kìⁿ-nā keng-kè hái--nih ê lō͘ ê, lóng hē tī i ê kha-ē.

9

Iâ-hô-hoa, góan ê Chú ah, Lí ê miâ tī chôan-tōe kàu hiah kôaiⁿ-tōa!