Si-phian 第 9 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ, tiāu, ēng Bō͘-la̍h-piān.1) Góa beh chôan-sim kám-siā Iâ-hô-hoa; Góa beh pò-iông Lí it-chhè kî-biāu ê só͘-chòe.

2

Góa beh chāi-tī Lí hoaⁿ-hí khòai-lo̍k; Chì-kôaiⁿ--ê ah, góa beh o-ló Lí ê miâ.

3

Góa ê tùi-te̍k o̍at-tńg-sin thè--khì ê sî, Chiū tī Lí ê bīn-chêng po̍ah-tó bia̍t-bô.

4

Lí í-keng thòe góa sin-oan, thòe góa piān-bêng; Lí chē tī pó-chō, chiàu kong-gī sím-phòaⁿ.

5

Lí ū chek-pī lia̍t-pang, Lí ū bia̍t-bô pháiⁿ-lâng, Lí ū chhat-bia̍t in ê miâ kàu éng-óan.

6

Tùi-te̍k kàu kiat-kio̍k, siū hong-hòe kàu éng-óan; Lí húi-hōai in ê siâⁿ; Liân in ê kì-liām ia̍h bô--khì.

7

To̍k-to̍k Iâ-hô-hoa chē-ūi kàu éng-óan; I í-keng ūi sím-phòaⁿ, an-tì I ê pó-chō.

8

I beh chiàu kong-gī sím-phòaⁿ sè-kài, Chiàu chèng-tı̍t phòaⁿ-tòan chèng peh-sìⁿ.

9

Iâ-hô-hoa koh beh chòe siū ap-pek ê lâng ê kôaiⁿ-tâi, Tī hōan-lān ê sî ê kôaiⁿ-tâi.

10

Bat Lí ê miâ ê lâng beh óa-khò Lí; In-ūi, Iâ-hô-hoa, Lí bē-bat khì-sak chhē Lí ê lâng.

11

Tio̍h o-ló khiā-khí Sek-an ê Iâ-hô-hoa, Chiong I só͘ kiâⁿ--ê pò-iông tī chèng peh-sìⁿ ê tiong-kan.

12

In-ūi hit ê cha-pān bēng-àn--ê kì-tit in; Bô bōe kì-tit khùn-khó͘ lâng ê ai-kiû.

13

Iâ-hô-hoa ah, kiû Lí lîn-bín góa; Lí sī tùi sí-mn̂g kiù góa khí--lâi--ê, Tio̍h kàm-chhat hiah ê òan-hūn góa ê lâng só͘ hō͘ góa tú-tio̍h ê khó͘-lān.

14

Thang hō͘ góa kóng-khí Lí it-chhè ê hó miâ-siaⁿ; Góa beh tī Sek-an siâⁿ ê mn̂g, Ūi-tio̍h Lí ê kiù-un lâi hoaⁿ-hí.

15

Lia̍t-pang hām-lo̍h tī in só͘ khui ê hām-khiⁿ; In ê kha tîⁿ tī in àm-chīⁿ siat ê lô-bāng.

16

Iâ-hô-hoa í-keng hián-bêng ka-kī, I í-keng kiâⁿ sím-phòaⁿ; Pháiⁿ lâng hō͘ ka-kī ê chhiú só͘ chòe--ê tîⁿ--tio̍h. [Hi-kai-un. Sè-la̍h

17

Pháiⁿ-lâng beh kui tī im-hú, Bōe kì--tit Siōng-tè ê lia̍t-pang ia̍h beh án-ni.

18

In-ūi sòng-hiong-lâng tek-khak bô éng-óan hō͘ Siōng-tè bōe kì-tit, Khùn-khó͘ ê lâng ê ǹg-bāng, tek-khak bōe éng-éng bô--khì.

19

Iâ-hô-hoa ah, kiû Lí khí--lâi, m̄-thang iông-ún lâng khah-iâⁿ; Gōan lia̍t-pang tī Lí ê bīn-chêng siū sím-phòaⁿ.

20

Iâ-hô-hoa ah, kiû Lí hō͘ in kiaⁿ-hiâⁿ; Gōan lia̍t-pang chai ka-kī put-kò sī lâng nā-tiāⁿ. [Sè-la̍h