Si-phian 第 10 章 - 巴克禮全羅

1

Iâ-hô-hoa ah, Lí siáⁿ-sū hn̄g-hn̄g teh khiā? Tī hōan-lān ê sî, Lí siáⁿ-sū tiàm-ba̍t?

2

Pháiⁿ-lâng tī kiau-ngō͘ ê tiong-kan, tui-jip khùn-khó͘ ê lâng chin kín-kip, Gōan in hām-lo̍h tī ka-kī só͘ siat ê kè-bô͘.

3

Pháiⁿ-lâng khoa-kháu i ê sim só͘ ài, Tham--sim--ê khì-sak Iâ-hô-hoa, koh bú-bān I.

4

Pháiⁿ-lâng bīn tài kiau-ngō͘, kóng, I bô-beh kiù-khàm; I só͘ siūⁿ--ê lóng lia̍h-chòe bô Siōng-tè.

5

Kìⁿ-nā i só͘ kiâⁿ--ê siông-siông ún-tàng; Lí ê sím-phòaⁿ pôaⁿ-kè i ê gán-kài; Lūn-kàu i it-chhè ê tùi-te̍k, i lóng biáu-sī in.

6

I sim-lāi kóng, Góa tek-khak bōe iô-choah, Tāi-tāi bōe tú-tio̍h chai-lān.

7

I ê chhùi móa-móa chiù-mē, kan-chà, khi-ap; I ê chı̍h-ē ok-to̍k, hu-ké.

8

I tī hiuⁿ-chhng bâi-ho̍k ê só͘-chāi chē-teh; I tī ún-ba̍t ê só͘-chāi hāi-sí bô chōe ê lâng, I ê ba̍k-chiu àm-chīⁿ tı̍t-tı̍t siòng bô i-óa ê lâng.

9

I bâi-ho̍k tī àm-chīⁿ ê só͘-chāi, chhin-chhiūⁿ sai bih tī i ê hia̍t; I bâi-ho̍k beh lia̍h sòng-hiong lâng; Ēng bāng ûi sòng-hiong lâng, lâi lia̍h--tio̍h i.

10

I khut-sin phak--teh, Bô i-óa ê lâng chiū tó tī i jiáu-gê--ê ē-bīn.

11

I sim-lāi kóng, Siōng-tè bōe-kì-tit; Ng I ê bīn; éng-óan bô khòaⁿ-kìⁿ.

12

Iâ-hô-hoa ah, kiû Lí khí--lâi; Siōng-tè ah, kia̍h-khí Lí ê chhiú; M̄-thang bōe kì-tit sòng-hiong-lâng.

13

Pháiⁿ-lâng siáⁿ-sū biáu-sī Siōng-tè, Sim-lāi kóng, Lí bô beh kun-kiù?

14

Lí í-keng khòaⁿ-kìⁿ; in-ūi ok-to̍k òan-tò͘, Lí lóng kàm-chhat, beh ēng Lí ê chhiú pò-èng; Bô i-óa ê lâng, chiong pún-sin kau-tài Lí; Lí sī pang-chān bô pē ê kiáⁿ--ê.

15

Gōan Lí phah-chı̍h pháiⁿ-lâng ê chhiú-kut; Lūn-kàu ok-lâng, gōan Lí kun-kiù i ê pháiⁿ kàu thiat-tí.

16

Iâ-hô-hoa chòe ông, tùi éng-óan kàu éng-óan; Lia̍t-pang-lâng tùi I ê tōe lóng bia̍t-bô.

17

Iâ-hô-hoa ah, khiam-pi ê lâng ê sim-gōan, Lí í-keng thiaⁿ-kìⁿ; Lí beh pī-pān in ê sim, Lí beh àⁿ hī-khang lâi thiaⁿ.

18

Beh thòe bô pē ê kiáⁿ, í-kı̍p siū ap-pek ê lâng, sin-oan. Hō͘ sè-kan-lâng bô koh háng-hoah lâng.