Si-phian 第 76 章 - 巴克禮全羅

1

A-sat ê si-koa, kau hō͘ Ga̍k-koaⁿ; ēng si-hiân ê ga̍k-khì.1) Tī Iû-tāi Siōng-tè hō͘ lâng só͘ bat; Tī Í-sek-lia̍t I ê miâ chòe tōa.

2

Tī Sat-léng ū I ê tiùⁿ-pâng, Tī Sek-an ū I khiā-khí ê só͘-chāi.

3

I tī-hia at-chı̍h keng ê chìⁿ, Kap tîn-pâi, to-kiàm, í-kı̍p kau-chiàn ê ke-si. [Sè-la̍h

4

Lí tùi chhiúⁿ-mı̍h ê soaⁿ-chē lâi, ū êng-kng kap ui-giâm.

5

Sim ióng-kám ê lâng lóng siū chhiúⁿ-kiap; in ê khùn sī tn̂g-tn̂g khùn; Eng-hiông ê lâng, bô chı̍t-ê ōe chhut-chhiú.

6

Ngá-kok ê Siōng-tè ah, Lí ê chek-pī chı̍t-ē hoat-chhut, Chhia, bé, lóng khùn tāng-bîn.

7

To̍k-to̍k Lí sī thang kiaⁿ--ê; Lí ê siū-khì chı̍t-ē hoat-chhut, chī-chūi tī Lí ê bīn-chêng khiā-ōe-tiâu ah?

8

Lí tùi thiⁿ--nih hō͘ lâng thiaⁿ phòaⁿ-tòan; Tōe chiū kiaⁿ-hiâⁿ chēng-chēng;

9

Chiū-sī Siōng-tè khí--lâi sím-phòaⁿ, Beh kiù tōe-chiūⁿ it-chhè khiam-pi ê lâng. [Sè-la̍h

10

Lâng ê siū-khì, tek-khak hō͘ Lí tit-tio̍h o-ló; Kî-û ê siū-khì, Lí beh kìm-chí.

11

Lín tio̍h tùi lín ê Siōng-tè Iâ-hô-hoa hē-gōan koh siā-gōan; Sì-ûi ê lâng tio̍h tòa lé-mı̍h kòng-hiàn tī thang kèng-ùi ê Chú.

12

I beh at-chí kùi-cho̍k ê kiau-khì, I hō͘ sè-chiūⁿ ê lia̍t-ông kiaⁿ-ùi.