Si-phian 第 75 章 - 巴克禮全羅

1

A-sat ê si-koa, kau hō͘ Ga̍k-koaⁿ; tiāu, sī ēng "Bo̍h-tit húi-hōai--ê".1) Siōng-tè ah, góan kám-siā Lí, Góan kám-siā Lí, in-ūi Lí ê miâ kūn-kūn; Lâng pò-iông Lí kî-biāu ê só͘-chòe.

2

Góa kàu tiāⁿ-tio̍h ê jı̍t-kî, Góa beh chiàu chèng-tı̍t sím-phòaⁿ.

3

Tōe kap tōe-chiūⁿ khiā-khí ê peh-sìⁿ lóng siau-iûⁿ; Góa chim-chio̍k khiā-chāi tōe ê thiāu. [Sè-la̍h

4

Góa tùi kiau-ngō͘ ê lâng kóng, Bo̍h-tit kiau-ngō͘; Tùi pháiⁿ-lâng kóng, Bo̍h-tit kia̍h-khí lí ê kak;

5

Bo̍h-tit kôaiⁿ-kôaiⁿ kia̍h-khí lí ê kak; Bo̍h-tit ngī lí ê ām-kún lâi kóng-ōe.

6

In-ūi m̄-sī tùi tang, m̄-sī tùi sai, Ia̍h m̄-sī tùi lâm lâi tit-tio̍h kú-khí;

7

Chí-ū Siōng-tè sī phòaⁿ-tòan--ê, I hō͘ chit-ê kàng-kē, hō͘ hit-ê seng-kôaiⁿ.

8

Iâ-hô-hoa chhiú--nih ū poe, kî-tiong ê chiú khí phe̍h; Poe-lāi ū kè-thàu ê chiú móa-móa, I piàⁿ--chhut-lâi; Tōe-chiūⁿ ê pháiⁿ-lâng beh lóng lim chit ê chiú ê che-tái, lim kàu liáu-liáu.

9

To̍k-to̍k góa beh pò-iông tı̍t kàu éng-óan; Góa beh chhiùⁿ-koa o-ló Ngá-kok ê Siōng-tè.

10

Pháiⁿ-lâng it-chhè ê kak, Góa beh chām-tn̄g; Gī-lâng ê kak beh tit-tio̍h kú-khí.