Si-phian 第 74 章 - 巴克禮全羅

1

A-sat kà-sī ê si.1) Siōng-tè ah, Lí siáⁿ-sū éng-óan pàng-sak góan? Lí siáⁿ-sū siū-khì Lí chháu-tiûⁿ ê iûⁿ, chhin-chhiūⁿ chhut hé-ian?

2

Kiû Lí kì-liām Lí chá-sî só͘ tit-tio̍h ê hōe-chiòng, Chiū-sī Lí só͘ sio̍k-hôe chòe Lí ê gia̍p ê chi-phài ê; Iā tio̍h kì-liām Lí pêng-sî só͘ khiā-khí ê Sek-an soaⁿ.

3

Kiû Lí kiâⁿ kàu hiah ê kú-kú pha-hng ê tōe, Khòaⁿ tùi-te̍k tī sèng-só͘ it-chhè só͘ húi-hōai ê.

4

Lí ê tùi-te̍k tī Lí ê hōe-lāi hōa-hōa-háu; In khiā in ê kî chòe kì-hō.

5

In chhin-chhiūⁿ lâng kia̍h-khí pó͘-thâu, Lâi chhò chhiū-nâ ê chhiū.

6

Sèng-só͘ ê lāi-bīn it-chhè tiau-khek-ê, In hiān-chāi ēng pó͘-thâu kap thûi it-chīn phah-pháiⁿ.

7

In pàng-hé sio Lí ê sèng-só͘, Phah lâ-sâm Lí ê miâ só͘ khiā-khí ê só͘-chāi, chiâⁿ-chòe pîⁿ-tōe.

8

In sim-lāi kóng, Lán tio̍h it-chīn húi-hōai in; In tī piàn-tōe chiong Siōng-tè ê hōe-tn̂g lóng sio-lio--khì.

9

Góan bô khòaⁿ-kìⁿ góan ê tiāu-thâu, Bô koh ū sian-ti; Góan tiong-kan iā bô lâng chai beh kàu sím-mı̍h sî.

10

Siōng-tè ah, tùi-te̍k ki-chhì beh kàu sím-mı̍h sî? Kiû-siû siat-to̍k Lí ê miâ beh kàu éng-óan mah?

11

Lí ūi-hô kiu Lí ê chhiú, chiū-sī Lí ê chiàⁿ-chhiú? Kiû Lí tùi Lí ê heng-chêng chhun-chhut--lâi, húi-bia̍t in.

12

Chóng-sī Siōng-tè tùi chá í-lâi chòe góa ê ông, Tī tōe--nih kiâⁿ chín-kiù.

13

Lí bat ēng Lí ê kôan-lêng chiong hái pun-khui; Phah-phòa chúi-tiong tōa tōng-bu̍t ê thâu-khak.

14

Lí bat kòng-chhùi go̍k-hî ê thâu-khak, Chiong i hō͘ khòng-iá ê iá-siù chòe chia̍h-mı̍h.

15

Lí bat pun-khui chúi-gôan kap hô; Lí bat hō͘ tn̂g-lâu ê kang-hô ta--khì.

16

Jı̍t--sî sio̍k Lí, mî--sî iā sio̍k Lí; Kng kap jı̍t-thâu sī Lí só͘ pī-pān--ê.

17

Tōe-chiūⁿ it-chhè ê kài-hān sī Lí só͘ siat-lı̍p; Hē-thiⁿ kap tang-thiⁿ sī Lí só͘ tiāⁿ-tio̍h.

18

Iâ-hô-hoa ah, kiû Lí kì-tit, tùi-te̍k ū húi-pòng, Gōng ê peh-sìⁿ siat-to̍k Lí ê miâ.

19

Lí ê ka-chui ê sìⁿ-miā, m̄-thang kau hō͘ iá-siù; Lí sòng-hiong lâng ê o̍ah-miā m̄-thang éng-óan bōe kì-tit.

20

Kiû Lí siàu-liām só͘ lı̍p ê iok; In-ūi tōe-chiūⁿ o͘-àm ê só͘-chāi móa-móa sī kiông-pō ê châu-hia̍t

21

Siū ap-chè ê lâng, m̄-thang hō͘ in kiàn-siàu tò--khì; Khùn-khó͘ sòng-hiong ê lâng tio̍h hō͘ in o-ló Lí ê miâ.

22

Siōng-tè ah, kiû Lí khí-lâi ūi ka-kī hun-sò͘; Tio̍h kì--tit gōng-lâng thong-jı̍t cháiⁿ-iūⁿ teh húi-pòng Lí.

23

M̄-thang bōe-kì--tit Lí ê tùi-te̍k ê siaⁿ; Hiah ê khí-lâi kong-kek Lí ê lâng, in ê hán-hōa siông-siông chiūⁿ kàu téng-bīn.