Si-phian 第 73 章 - 巴克禮全羅

1

A-sat ê si.1) Siōng-tè sı̍t-chāi hó khóan-thāi Í-sek-lia̍t, Hó khóan-thāi hiah ê sim chheng-khì ê lâng.

2

Chóng-sī lūn-kàu góa, góa ê kha hiám-hiám ta̍h-thu̍t, Góa ê kha hiám-hiám chhū--lo̍h-khì.

3

In-ūi góa khòaⁿ-kìⁿ pháiⁿ-lâng kap kiau-ngō͘ ê lâng heng-ōng, Hit-sî góa chiū put-pêng.

4

In-ūi in sí ê sî bô thàng-thiàⁿ, In ê khùi-la̍t iā ióng-kiāⁿ.

5

In bô chhin-chhiūⁿ pa̍t-lâng lô-khó͘, Iā bô chhin-chhiūⁿ pa̍t-lâng siū chai-ē.

6

Só͘-í ēng kiau-ngō͘ chòe liān-á kòa tī in ê ām-kún, Ēng pō-gio̍k chòe i-chiûⁿ jia in ê seng-khu.

7

In in-ūi sin-thé pûi, ba̍k-chiu chiū phòng-chhut; In só͘ tit-tio̍h-ê, iâⁿ-kè sim só͘ ài--ê.

8

In ki-chhì lêng, chiàu pháiⁿ ì-sù kóng chè-ap lâng ê ōe; In kóng tōa-ōe.

9

In ê chhùi siat-to̍k thiⁿ, In ê chı̍h ho͘-hat chôan-tōe.

10

Só͘-í i ê peh-sìⁿ kui-óa tī-chia, Móa-poe ê chúi in lim kàu liáu.

11

In kóng, Siōng-tè thái-thó ōe chai? Chì-kôaiⁿ--ê kiám ōe hiáu-tit mah?

12

Khòaⁿ, chiah-ê chiū-sī pháiⁿ-lâng; In siông-siông an-ia̍t, châi-pó ná ke-thiⁿ.

13

Góa chheng-khì góa ê sim sı̍t-chāi khang-khang; Góa bô chōe lâi sóe chhiú iā sī khang-khang.

14

In-ūi góa thong-jı̍t tú-tio̍h chai-ē, Ta̍k chá-khí siū chek-pī.

15

Góa nā kóng, Góa beh án-ni kóng, Che sī ēng kan-chà khóan-thāi Lí ê kiáⁿ-lūi.

16

Góa teh siūⁿ ài bêng-pe̍k chit ê lí, Khòaⁿ-liáu sı̍t-chāi ûi-lân;

17

Kàu góa jı̍p Siōng-tè sèng ê só͘-chāi, Siông-sè siūⁿ in ê kiat-kio̍k.

18

Lí sı̍t-chāi chiong in hē tī ku̍t-ku̍t ê tōe, Hō͘ in po̍ah tī tîm-lûn ê tiong-kan.

19

In ba̍k-nih-kú chiâⁿ-chòe hiah-nih chhiⁿ-chhìn; In hō͘ kiaⁿ-hiâⁿ bia̍t kàu liáu.

20

Lâng khùn cheng-sîn cháiⁿ-iūⁿ khòaⁿ i ê bāng, Chú ah, Lí cheng-sîn iā beh án-ni khòaⁿ-khin in ê iáⁿ-siōng.

21

In-ūi góa ê sim chin sng, Góa ê chōng-hú chhì-chha̍k.

22

Góa chit-khóan ê gû-gōng, bû-ti; Tī Lí ê bīn-chêng chhin-chhiūⁿ cheng-siⁿ chı̍t-poaⁿ.

23

Chóng-sī góa siông-siông kap Lí tī-teh, Lí khan góa ê chiàⁿ-chhiú.

24

Lí beh ēng Lí ê kà-sī ín-chhōa góa, Āu-lâi beh chiap-la̍p góa jı̍p tī êng-kng.

25

Lí í-gōa tī thiⁿ--nih góa ū chī-chūi? Lí í-gōa tī tōe--nih góa bô só͘ him-bō͘.

26

Góa ê jio̍k-thé, góa ê sim-tn̂g, siau-bô, Chóng-sī Siōng-tè sī góa sim-koaⁿ ê khùi-la̍t, iā sī góa ê ki-gia̍p tı̍t-kàu éng-óan.

27

Lī-khui Lí hn̄g-hn̄g-ê tek-khak sí-bô; Hōan-nā pàng-sak Lí kiâⁿ kan-îm-ê, Lí lóng bia̍t-bô in.

28

Chóng-sī góa chiū-kūn Siōng-tè sī chòe góa ê lī-ek; Góa ēng Chú Iâ-hô-hoa chòe góa siám-pī ê só͘-chāi, Thang hō͘ góa kóng-khí Lí it-chhè ê só͘-chòe.