Si-phian 第 72 章 - 巴克禮全羅

1

Só͘-lô-bûn ê si.1) Siōng-tè ah, kiû Lí chiong Lí ê phòaⁿ-tòan siúⁿ-sù ông, Chiong Lí ê kong-gī siúⁿ-sù ông ê kiáⁿ.

2

I beh chiàu kong-gī sím-phòaⁿ Lí ê peh-sìⁿ, Chiàu kong-pêng phòaⁿ-tòan Lí hiah ê khùn-khó͘ ê lâng.

3

Tōa-soaⁿ beh in-ūi kong-gī, hō͘ peh-sìⁿ pêng-an, Soaⁿ-á iā beh án-ni.

4

I beh kā peh-sìⁿ-tiong khùn-khó͘ ê lâng phòaⁿ-tòan, I beh kiù sòng-hiong ê lâng, I beh teh-chhùi pō-gio̍k ê lâng.

5

Lâng beh kèng-ùi Lí jı̍t-kú ge̍h-tn̂g, Tı̍t-kàu bān sè-tāi.

6

I beh kàng-lîm chhin-chhiūⁿ hō͘ lo̍h tī í-keng koah ê chháu, Chhin-chhiūⁿ kı̍p-sî ê hō͘ lūn-te̍k thó͘-tōe.

7

Tī i ê jı̍t-chí gī-lâng beh heng-ōng; Tōa-tōa pêng-an kap ge̍h pîⁿ kú.

8

I beh chiáng-kôan tùi chit ê hái kàu hit ê hái, Tùi Tōa-hô kàu tōe-ke̍k.

9

Khiā-khí tī khòng-iá-ê beh kūi-pài tī i ê bīn-chêng; I ê tùi-te̍k beh chī thô͘-hún.

10

Tha-si kap hái-sū ê lia̍t-ông beh chìn-kòng; Sī-pa kap Se-pa ê ông beh hiàn lé-mı̍h.

11

Lia̍t-ông lóng beh phak-lo̍h pài i, Bān-kok lóng beh ho̍k-sāi i.

12

In-ūi sòng-hiong lâng kiû-kiò ê sî, i beh kiù i; Khùn-khó͘ bô i-óa ê lâng i iā beh kiù.

13

I beh lîn-bín chheng-tām sòng-hiong ê lâng, I beh chín-kiù sòng-hiong lâng ê sìⁿ-miā.

14

I beh kiù-sio̍k in ê sìⁿ-miā thoat-lī ap-pek kap pō-gio̍k; I beh khòaⁿ in ê huih chòe pó-pòe.

15

I beh o̍ah--teh; beh chiong Sī-pa ê kim hō͘ i, Beh siông-siông ūi i kî-tó, Thong-jı̍t o-ló i.

16

Tī tōe--nih, tī soaⁿ-téng, gō͘-kak tek-khak bō͘-sēng, Só͘ kiat ê gō͘-kak beh iô-tāng, chhin-chhiūⁿ Lī-pa-lùn ê chhiū; Siâⁿ-lāi ê lâng beh heng-ōng, chhin-chhiūⁿ tōe-chiūⁿ ê chháu.

17

I ê miâ beh lâu kàu éng-óan; I ê miâ beh liû-thôan chhin-chhiūⁿ jı̍t ê kú; Lâng beh in-ūi i lâi tit-tio̍h hok-khì; Bān-kok beh chheng-ho͘ i ū hok-khì.

18

Iâ-hô-hoa Siōng-tè, chiū-sī Í-sek-lia̍t ê Siōng-tè, Chí-ū I kiâⁿ kî-īⁿ ê sū, eng-kai o-ló I.

19

Gōan I êng-kng ê miâ éng-óan siū o-ló; Gōan I ê êng-kng chhiong-móa chôan-tōe. A-bēng, koh A-bēng.

20

Iâ-se ê kiáⁿ Tāi-pı̍t ê kî-tó bêng-pe̍k.