Si-phian 第 71 章 - 巴克禮全羅

1

Iâ-hô-hoa ah, góa óa-khò Lí, Kiû Lí hō͘ góa éng-éng bô kiàn-siàu.

2

Chiàu Lí ê kong-gī chín-kiù góa, hō͘ góa thoat-lī; Àⁿ hī-khang thiaⁿ góa, lâi kiù góa.

3

Kiû Lí chòe góa thang khiā-khí ê chio̍h-pôaⁿ, hō͘ góa siông-siông khì tiàm hia; Lí í-keng bēng-lēng beh kiù góa. In-ūi Lí sī góa ê soaⁿ-giâm, góa ê soaⁿ-chē.

4

Góa ê Siōng-tè ah, kiû Lí kiù góa thoat-lī pháiⁿ-lâng ê chhiú, Thoat-lī put-gī kap chân-jím ê lâng ê chhiú-thâu.

5

In-ūi Chú Iâ-hô-hoa, Lí sī góa só͘ ǹg-bāng-ê; Tùi góa siàu-liân ê sî Lí sī góa só͘ óa-khò-ê.

6

Góa tùi thai--nih hō͘ Lí hû-chhî, Hō͘ góa chhut lāu-bú ê pak-tó͘ ê, sī Lí; Góa beh siông-siông o-ló Lí.

7

Chōe-chōe lâng lia̍h góa chòe kî-kòai; Chóng-sī Lí sī góa kian-kò͘ tô-siám ê só͘-chāi.

8

Góa móa-chhùi beh o-ló Lí, Thong-jı̍t beh êng-kng Lí.

9

Góa nî-lāu ê sî, kiû Lí m̄-thang pàng-sak góa; Góa khùi-la̍t soe-lám ê sî, kiû Lí m̄-thang lī-khui góa.

10

In-ūi góa ê tùi-te̍k gī-lūn góa; Hiah-ê tng-tán beh hāi góa ê sìⁿ-miā--ê saⁿ-kap chham-siông,

11

Kóng, Siōng-tè í-keng pàng-sak i; Taⁿ tio̍h tui-kóaⁿ i, lia̍h i; in-ūi bô kiù i ê.

12

Siōng-tè ah, kiû Lí m̄-thang lī-khui góa hn̄g-hn̄g; Góa ê Siōng-tè ah, kiû Lí kín-kín lâi pang-chān góa.

13

Gōan hiah-ê chòe góa sìⁿ-miā ê tùi-te̍k ê, siū kiàn-siàu bia̍t-bô; Gōan hiah ê kè-bô͘ hāi góa ê, siū lêng-jio̍k làu-khùi.

14

Chóng-sī góa beh siông-siông ǹg-bāng, Góa beh ná-kú ná o-ló Lí,

15

Lí ê kong-gī, í-kı̍p Lí ê chín-kiù sǹg-bōe-liáu, Góa ê chhùi thong-jı̍t beh kóng-khí.

16

Góa beh lâi kóng Chú Iâ-hô-hoa tōa kôan-lêng ê sū; Góa toaⁿ-toaⁿ beh kóng-khí Lí ê gī.

17

Siōng-tè ah, tùi góa siàu-liân ê sî Lí ū kà-sī góa; Kàu hiān-kim góa bat pò-iông Lí kî-biāu ê só͘-chòe.

18

Siōng-tè ah, góa kàu nî-lāu; thâu-mn̂g-pe̍h ê sî, kiû Lí m̄-thang pàng-sak góa; Thèng-hāu góa chiong Lí ê khùi-la̍t chí-sī ē-tāi, Chiong Lí ê tōa kôan-lêng chí-sī it-chhè chiong-lâi ê lâng.

19

Siōng-tè ah, Lí ê gī chin kôaiⁿ; Siōng-tè ah, Lí bat kiâⁿ tōa ê sū; Chī-chūi ōe chhin-chhiūⁿ Lí?

20

Lí sī hō͘ góan le̍k-kè chōe-chōe tōa hōan-lān ê; Lí beh hō͘ góan koh-chài o̍ah; Iā beh kiù góan tùi tōe ê chhim-ian khí-lâi.

21

Kiû Lí hō͘ góa ná kôaiⁿ-tōa, Koh tò-tńg an-ùi góa.

22

Góa ê Siōng-tè ah, góa beh tôaⁿ-sek o-ló Lí, O-ló Lí ê chin-sı̍t; Í-sek-lia̍t ê Sèng-ê ah, Góa beh tôaⁿ-khîm o-ló Lí.

23

Góa chhiùⁿ-koa o-ló Lí ê sî, Góa ê chhùi-tûn, í-kı̍p Lí só͘ kiù-sio̍k góa ê lêng-hûn, beh hoaⁿ-hí chhut-siaⁿ.

24

Koh góa ê chı̍h kui-jı̍t beh káng-lūn Lí ê gī, In-ūi hiah ê kè-bô͘ hāi góa ê lâng í-keng kiàn-siàu siū lêng-jio̍k.