Si-phian 第 78 章 - 巴克禮全羅

1

A-sat kà-sī ê si.1) Góa ê peh-sìⁿ ah, lín tio̍h thiaⁿ góa ê kà-sī, Àⁿ hī-khang thiaⁿ góa ê chhùi ê ōe.

2

Góa beh khui-chhùi siat phì-jū, Góa beh kóng-chhut kó͘-chá ún-ba̍t ê ōe,

3

Chiū-sī góan só͘ thiaⁿ-kìⁿ, só͘ chai ê; Ia̍h sī góan ê chó͘-kong thôan hō͘ góan--ê.

4

Góan bô beh chiong chiah ê sū tùi in ê kiáⁿ-sun ún-môa; Beh chiong Iâ-hô-hoa ê miâ-siaⁿ kap I ê kôan-lêng, í-kı̍p I só͘ kiâⁿ kî-biāu ê sū, Thôan hō͘ āu sè-tāi.

5

In-ūi I tī Ngá-kok lı̍p kan-chèng ê ōe, tī Í-sek-lia̍t siat lu̍t-hoat; Sī I bēng-lēng lán ê chó͘-kong ê, thang thôan hō͘ in ê kiáⁿ-sun.

6

Hō͘ āu-tāi, chiū-sī tit-beh chhut-sì ê kiáⁿ-sun chai; In ia̍h beh khí-lâi thôan hō͘ in ê kiáⁿ-sun;

7

Hō͘ in ê ǹg-bāng chāi-tī Siōng-tè, Bô bōe-kì-tit Chôan-lêng--ê ê só͘ chòe, Sī beh chun-siú I ê kài-bēng.

8

Bián-tit chhin-chhiūⁿ in ê chó͘-kong, Sī ngī-sim pōe-ge̍k ê sè-tāi, Sī chûn-sim bô sì-chiàⁿ ê sè-tāi, In ǹg Siōng-tè ê sim bô kian-kò͘.

9

Í-hoat-liân ê kiáⁿ-sun kia̍h ke-si kap keng-chìⁿ, Lîm-tīn ê jı̍t, o̍at-tńg-sin thè-āu.

10

In bô chun-siú Siōng-tè ê iok, M̄-khéng chiàu I ê lu̍t-hoat lâi kiâⁿ.

11

Koh bōe-kì-tit I só͘-kiâⁿ-ê, Kap I só͘ hō͘ in khòaⁿ kî-biāu ê sū.

12

I tī Ai-kı̍p tōe, Só-an ê chhân, Tī in chó͘-kong ê ba̍k-chiu chêng, kiâⁿ kî-īⁿ ê sū.

13

I pun-khui hái, hō͘ in kè--khì; Koh hō͘ chúi khiā--khí-lâi, chhin-chhiūⁿ thô͘-tui.

14

I jı̍t--sî ēng hûn chhōa--in, Thong-mî ēng hé ê kng chhōa--in.

15

I tī khòng-iá hō͘ chio̍h-pôaⁿ lı̍h-khui, Hō͘ in chōe-chōe chúi thang lim, chhin-chhiūⁿ tùi chhim-ian chhut.

16

I hō͘ chúi tùi chio̍h-pôaⁿ chhèng-chhut, Hō͘ chúi chhin-chhiūⁿ kang-hô lâu-lo̍h.

17

In iû-gôan ta̍uh-ta̍uh tek-chōe I; Tī ta-sò ê tōe pōe-ge̍k Chì-kôaiⁿ--ê.

18

In sim-lāi chhì Siōng-tè, Chiàu in ka-kī só͘-ài--ê kiû chia̍h-mı̍h.

19

In lām-sám gī-lūn Siōng-tè, kóng, Chôan-lêng ê Chú tī khòng-iá kiám ōe pān-toh mah?

20

I bat phah chio̍h-pôaⁿ hō͘ chúi chhèng-chhut, Kang-hô móa--chhut-lâi; I iā ōe siúⁿ-sù bí-niû mah? I iā ōe kā I ê peh-sìⁿ pī-pān bah mah?

21

Só͘-í Iâ-hô-hoa thiaⁿ-kìⁿ chiū siū-khì, Chiū ū iām-hé sio Ngá-kok ê ke, Siū-khì hoat-khí tī Í-sek-lia̍t cho̍k.

22

In-ūi in m̄ sìn-ho̍k Siōng-tè, M̄ óa-khò I ê kiù-un.

23

Chóng-sī I chiū bēng-lēng tī téng-bīn ê kiong-chhong, Koh khui thiⁿ ê mn̂g;

24

I kàng-lo̍h má-ná chhin-chhiūⁿ lo̍h hō͘, hō͘ in chia̍h; Chiong thiⁿ ê bí-niû siúⁿ-sù in.

25

Lâng chia̍h tōa-kôan-lêng--ê ê chia̍h-mı̍h; I siúⁿ-sù bí-niû hō͘ in pá-chiok.

26

I hō͘ tang-hong khí tī thiⁿ--nih; Ēng I ê kôan-lêng chhōa lâm-hong lâi.

27

I kàng-lo̍h bah tī in tiong-kan, chōe chhin-chhiūⁿ thô͘-hún, Koh pe-chiáu chōe chhin-chhiūⁿ hái-soa.

28

Lo̍h tī in ê iâⁿ-tiong, Tī in khiā-khí ê só͘-chāi ê sì-ûi.

29

In chiū chia̍h kàu pá-pá; I chiàu in só͘-ài-ê hō͘ in.

30

In ê só͘-ài, iáu-bē pá-ià, In ê chia̍h-mı̍h iáu tī in ê chhùi-lāi ê sî,

31

Siōng-tè chiū tùi in hoat-khí siū-khì, Thâi-sí in tiong-kan ê hó-hàn lâng, Táⁿ-tó Í-sek-lia̍t ê siàu-liân lâng.

32

Sui-jiân án-ni, in iû-gôan koh hōan-chōe; Bô in-ūi I kî-kòai ê só͘-chòe lâi sìn I.

33

Só͘-í I hō͘ in khang-khang kè-jı̍t; Hō͘ in le̍k-nî kiaⁿ-hiâⁿ.

34

I thâi in ê sî, in chiah lâi kiû I; Chiū o̍at-tò-tńg chhiat-chhiat kiû Siōng-tè.

35

In ia̍h tui-liām Siōng-tè sī in ê chio̍h-pôaⁿ, Chì-kôaiⁿ ê Chôan-lêng-ê sī sio̍k-hôe in--ê.

36

Chóng-sī in ēng chhùi thiám-mī I, Ēng chı̍h tùi I kóng pe̍h-chha̍t.

37

In-ūi in bô kian-sim ì-hiòng I, Bô chīn-tiong siú I ê iok.

38

Chóng-sī I ū lîn-bín, sià-bián in ê chōe-ok, bô bia̍t-bô in; Koh ta̍uh-ta̍uh siau I ê siū-khì, Bô it-chīn hoat-chhut I ê siū-khì.

39

I siūⁿ-tio̍h in put-kò sī hiat-khì, Sī chhe-kè--khì bô tò-tńg ê hong.

40

In tī khòng-iá pōe-ge̍k I, Tī pha-hng ê só͘-chāi, hō͘ I iu-būn, kàu hiah chōe pái ah!

41

In chài-saⁿ chhì Siōng-tè, Tú-tak Í-sek-lia̍t ê Sèng--ê.

42

In bōe-kì-tit I ê kôan-lêng, Kap sio̍k-hôe in thoat-lī tùi-te̍k ê jı̍t;

43

I cháiⁿ-iūⁿ tī Ai-kı̍p hián-chhut I ê sîn-jiah; Tī Só-an chhân, hián-chhut kî-sū;

44

Chiong in ê kang-hô pìⁿ-chòe huih, In ê káng ia̍h sī án-ni, tì-kàu lóng bōe lim--tit.

45

I hō͘ hô͘-sîn kui-tīn kàu in tiong-kan lâi cham in; Koh hō͘ chhân-kap-á lâi hāi in.

46

Chiong in ê thó͘-sán, kau hō͘ thâng-thōa; Chiong in lô-khó͘ lâi tit-tio̍h-ê kau hō͘ chháu-meh.

47

I lo̍h-pha̍uh, húi-hōai in ê phû-tô-chhiū, Lo̍h-sng, húi-hōai in ê sng-châi-chhiū.

48

Koh chiong in ê cheng-siⁿ kau hō͘ pha̍uh, Chiong in kui-kûn ê cheng-siⁿ kau hō͘ sih-nà.

49

I hoat-chhut I ê tōa siū-khì, Í-kı̍p siū-khì, thòng-hūn, khó͘-lān, Kui-tīn kàng chai-ē ê sù-chiá lóng kàu tī in.

50

I ūi-tio̍h ka-kī ê siū-khì pho͘-pîⁿ I ê lō͘; Hō͘ in ê sìⁿ-miā bōe bián-tit sí; Chiong in ê o̍ah-miā kau hō͘ un-e̍k.

51

Tī Ai-kı̍p phah-sí it-chhè ê tōa-kiáⁿ, Tī Hâm ê pò͘-pîⁿ-tiong phah-sí in ê thâu-chiūⁿ-kiáⁿ.

52

Chóng-sī I chhōa-chhut ka-kī ê peh-sìⁿ, chhin-chhiūⁿ iûⁿ; Tī khòng-iá chhōa in chhin-chhiūⁿ iûⁿ-kûn.

53

I chhōa in an-ún, hō͘ in bô kiaⁿ-hiâⁿ; Hái chiū im-sí in ê tùi-te̍k.

54

I koh chhōa in kàu sèng-tōe ê kau-kài; Kàu I chiàⁿ-chhiú só͘ tit-tio̍h chit ê soaⁿ.

55

I tī in ê bīn-chêng kóaⁿ-chhut lia̍t-pang-lâng; Ēng soh-á chiong gōa-pang-lâng ê tōe niû hō͘ in chòe-gia̍p; Hō͘ Í-sek-lia̍t ê chi-phài khiā-khí in ê pò͘-pîⁿ.

56

In iû-gôan chhì chì-kôaiⁿ ê Siōng-tè, lâi pōe-ge̍k I; Bô siú I kan-chèng ê ōe.

57

Sit-sìn pōe-ge̍k, bô koh-iūⁿ in ê chó͘-kong; Piàn-khóan chhin-chhiūⁿ keng péng-lìn-tńg.

58

In-ūi in ēng in soaⁿ-thâu ê tôaⁿ, jiá-tio̍h I ê siū-khì; Ēng in tiau-khek ê ngó͘-siōng, hō͘ I thòng-hūn.

59

Siōng-tè thiaⁿ-kìⁿ chiū siū-khì, Tōa iàm-ò͘ⁿ Í-sek-lia̍t.

60

Sīm-chì khì-sak Sī-lô ê hōe-bō͘, Chiū-sī I tī lâng ê tiong-kan só͘ tah ê pò͘-pîⁿ.

61

Koh chiong I ê khùi-la̍t, kau hō͘ lâng chhiúⁿ--khì; Chiong I ê êng-kng kau tī tùi-te̍k ê chhiú.

62

Ia̍h chiong I ê peh-sìⁿ kau hō͘ to-kiàm, Lâi siū-khì I ê ke-gia̍p.

63

In ê siàu-liân lâng hō͘ hé sio-bia̍t, In ê chāi-sek-lú bô tit-tio̍h lâng ê hō-hí.

64

Chè-si tó tī to-ē, Chiú-kóaⁿ-lâng ia̍h bô thî-khàu.

65

Hit-sî Chú chhin-chhiūⁿ khùn ê lâng cheng-sîn; Chhin-chhiūⁿ ióng-béng ê lâng, lim-chiú teh hoah.

66

I phah-thè I ê tùi-te̍k; Hō͘ in éng-éng siū lêng-jio̍k.

67

Koh I khì-sak Iok-sek ê pò͘-pîⁿ, Bô kéng-sóan Í-hoat-liân ê chi-phài;

68

Chóng-sī kéng Iû-tāi ê chi-phài, I só͘ ì-ài ê Sek-an soaⁿ.

69

Koh khí-chō I ê Sèng-só͘, kôaiⁿ chhin-chhiūⁿ thiⁿ, Koh chhin-chhiūⁿ I kiàn-lı̍p éng-éng tī-teh ê tōe.

70

Koh kéng I ê lô͘-po̍k Tāi-pı̍t, Chhōa i tùi iûⁿ-tiâu lâi.

71

Hō͘ i bô koh tè hiah ê iûⁿ-bú, Beh hō͘ i iúⁿ-chhī I ê peh-sìⁿ Ngá-kok, kap I ê ke-gia̍p Í-sek-lia̍t,

72

I chiū chiàu i sim-lāi ê chèng-tı̍t iúⁿ-chhī in; Koh ēng i khiáu-biāu ê chhiú ín-chhōa in.