Si-phian 第 79 章 - 巴克禮全羅

1

A-sat ê si.1) Siōng-tè ah, gōa-pang-lâng chìn-jı̍p Lí ê sán-gia̍p, Phah lâ-sâm Lí ê sèng-tiān, Hō͘ Iâ-lō͘-sat-léng pìⁿ-chiâⁿ thô͘-tui.

2

In chiong Lí ê lô͘-po̍k ê sin-si, kau hō͘ khong-tiong ê pe-chiáu, chòe chia̍h-mı̍h; Chiong Lí sèng ê peh-sìⁿ ê bah, kau hō͘ tōe-chiūⁿ ê iá-siù.

3

Tī Iâ-lō͘-sat-léng chiu-ûi, lâu in ê huih chhin-chhiūⁿ chúi; Ia̍h bô lâng bâi-chòng i.

4

Góan hō͘ góan keh-piah kok só͘ lêng-jio̍k, Hō͘ góan sì-ûi ê lâng léng-chhiò ki-chhì.

5

Iâ-hô-hoa ah, Lí ê siū-khì beh jōa-kú, kàu éng-óan mah? Lí ê siū-khì beh chhin-chhiūⁿ hé to̍h mah?

6

Gōan Lí chiong Lí ê siū-khì piàⁿ-lo̍h tī hiah ê m̄-bat Lí ê gōa-pang, Í-kı̍p hiah-ê bô kiû-kiò Lí ê miâ ê lia̍t-kok.

7

In-ūi in thun-chia̍h Ngá-kok, Hō͘ i khiā-khí ê só͘-chāi pha-hng.

8

Kiû Lí m̄-thang kì-tit góan ê chó͘-kong ê chōe, lâi tùi góan thó; Gōan Lí ê chû-pi kín-kín lîm-kàu góan; In-ūi góan lo̍h kàu ke̍k pi-bî ê tōe-ūi.

9

Kiù góan ê Siōng-tè ah, kiû Lí in-ūi Lí ê miâ ê êng-kng pang-chān góan; In-ūi Lí ê miâ ê iân-kò͘ kiù góan, sià-bián góan ê chōe.

10

Siáⁿ-sū tì-kàu gōa-pang lâng kóng, In ê Siōng-tè tī toh-lo̍h? Gōan Lí sin Lí ê lô͘-po̍k lâu-huih ê oan, hō͘ gōa-pang lâng chai, Hō͘ góan chhin-ba̍k khòaⁿ-kìⁿ.

11

Gōan siû-hōan ê thó͘-khùi thàu-kàu Lí ê bīn-chêng; Gōan Lí, chiàu Lí ê tōa kôan-lêng, pó-chûn hiah ê gí-tiāⁿ tio̍h-sí ê lâng.

12

Chú ah, gōan Lí chiong góan keh-piah kok só͘ lêng-jio̍k Lí ê lêng-jio̍k, Ke-thiⁿ chhit-pē, kui tī in ê sin-chiūⁿ.

13

Án-ni góan chòe Lí ê peh-sìⁿ, Lí ê chháu-tiûⁿ ê iûⁿ-ê, Beh kám-siā Lí kàu éng-óan; Beh o-ló Lí ê miâ kàu bān sè-tāi.