Si-phian 第 80 章 - 巴克禮全羅

1

A-sat ê si; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Í-sek-lia̍t ê bo̍k-chiá ah, chhōa Iok-sek chhin-chhiūⁿ iûⁿ-kûn--ê, kiû Lí àⁿ hī-khang thiaⁿ; Chē tī ki-lō͘-peng ê téng-bīn--ê, kiû Lí hoat-chhut Lí ê kng.

2

Tī Í-hoat-liân, Piān-ngá-bín, Má-ná-se ê bīn-chêng, tián-chhut Lí ê kôan-lêng, Lâi kiù góan.

3

Siōng-tè ah, hō͘ góan tò-tńg; Hō͘ Lí ê bīn hoat-chhut kng, góan chiū tit-tio̍h kiù.

4

Bān-kun ê Siōng-tè Iâ-hô-hoa ah, Lí ǹg Lí ê peh-sìⁿ ê kî-tó hoat-chhut siū-khì, beh jōa-kú ah?

5

Lí ēng ba̍k-sái chòe chia̍h-mı̍h, hō͘ in chia̍h; Koh niû chōe-chōe ba̍k-sái hō͘ in lim.

6

Lí hō͘ keh-piah-kok in-ūi góan lâi saⁿ-chiⁿ, Góan ê tùi-te̍k saⁿ-kap teh chhiò.

7

Bān-kun ê Siōng-tè ah, hō͘ góan tò-tńg, Hō͘ Lí ê bīn hoat-chhut kng, góan chiū tit-tio̍h kiù.

8

Lí tùi Ai-kı̍p sóa chı̍t-châng phû-tô-chhiū, Kóaⁿ-chhut lia̍t-pang, lâi chai--i,

9

Lí tī i ê thâu-chêng piàⁿ-khang thó͘-tōe; I ê kun tèng chhim, chiū siⁿ-thòaⁿ móa-tōe.

10

I ê iáⁿ jia-ba̍t chiah ê soaⁿ, I ê ki chhin-chhiūⁿ chin-hó ê peh-hiuⁿ-chhiū.

11

Hoat-chhut i ê ki, chhun kàu tōa-hái, I ê tîn thòaⁿ kàu Tōa-hô.

12

Lí siáⁿ-sū thiah-húi i ê lî-pa, Chhut-chāi it-chhè kè-lō͘ ê lâng bán--i?

13

Chhiū-nâ-lāi chhut-lâi ê soaⁿ-ti chau-that--i, Khòng-iá ê cháu-siù chia̍h--i.

14

Bān-kun ê Siōng-tè ah, kiû Lí tò-tńg; Tùi thiⁿ àⁿ-lo̍h khòaⁿ, chiàu-kò͘ chit châng phû-tô-chhiū,

15

Pó-hō͘ Lí chiàⁿ-chhiú só͘ chai--ê, Kap Lí ūi ka-kī só͘ kian-kò͘ ê ki.

16

I í-keng siū hé sio, siū to chhò; Ūi-tio̍h Lí ê bīn ê siū-khì, in chiū bia̍t-bô.

17

Gōan Lí ê chhiú hōaⁿ tī Lí chiàⁿ-pêng ê lâng, Chiū-sī Lí ūi ka-kī só͘ kian-kò͘ ê jîn-chú.

18

Án-ni, góan chiū bô tò-thè lī-khui Lí; Kiû Lí hō͘ góan tit-tio̍h o̍ah, góan chiū beh kiû-kiò Lí ê miâ.

19

Bān-kun ê Siōng-tè Iâ-hô-hoa ah, hō͘ góan tò-tńg; Hō͘ Lí ê bīn hoat-chhut kng, góan chiū tit-tio̍h kiù.