Si-phian 第 81 章 - 巴克禮全羅

1

A-sat ê si; kau hō͘ Ga̍k-koaⁿ; ēng Ka-te̍k ê tiāu.1) Siōng-tè sī góan ê khùi-la̍t, lín tio̍h tōa-siaⁿ o-ló I; Tio̍h chhut hoaⁿ-hí ê siaⁿ, o-ló Ngá-kok ê Siōng-tè.

2

Tio̍h chhiùⁿ si-koa, iô lin-long-kó͘; Tôaⁿ hó-thiaⁿ ê khîm kap sek.

3

Tio̍h tī chhoe-it cha̍p-gō͘, Góan choeh-kî ê jı̍t, pûn sàu-kak.

4

In-ūi che sī kā Í-sek-lia̍t tiāⁿ-tio̍h ê lu̍t-lē, Ngá-kok ê Siōng-tè ê lé-gî.

5

I khì kong-kek Ai-kı̍p tōe ê sî, Tī Iok-sek ê tiong-kan, lı̍p chit-ê chòe kan-chèng; Tī-hia góa thiaⁿ-kìⁿ só͘ bōe hiáu-tit ê ōe.

6

Siōng-tè kóng, Góa hō͘ i ê keng-thâu thoat-lī tāng-tàⁿ, Hō͘ i ê chhiú pàng-lo̍h kheng-á.

7

Lí tī hōan-lān-tiong kiû-kiò, Góa bat kiù lí; Góa tī lûi ún-ba̍t ê só͘-chāi ìn lí; Góa tī Bí-lī-pa ê chúi-piⁿ chhì lí. [Sè-la̍h

8

Góa ê peh-sìⁿ ah, lí tio̍h thiaⁿ; Góa beh tùi lí chòe kan-chèng; Í-sek-lia̍t ah, gōan lí thiaⁿ-thàn Góa.

9

Tī lí ê tiong-kan m̄-thang ū pa̍t ê siōng-tè, Gōa-pang ê siōng-tè, lí ia̍h m̄-thang kūi-pài.

10

Góa sī Iâ-hô-hoa, lí ê Siōng-tè, Bat chhōa lí tùi Ai-kı̍p tōe chiūⁿ--lâi; Tio̍h tōa khui lí ê chhùi, Góa chiū chhiong-móa--i.

11

Chóng-sī Góa ê peh-sìⁿ m̄-thiaⁿ Góa ê siaⁿ; Í-sek-lia̍t chôan-jiân m̄ chhiù-chhái Góa.

12

Góa chiū chhut-chāi in, chiàu in ê sim ê kò͘-chip; Hō͘ in chiàu in ka-kī ê kè-bô͘ khì kiâⁿ.

13

Gōan Góa ê peh-sìⁿ khéng thiaⁿ Góa; Í-sek-lia̍t khéng kiâⁿ Góa ê lō͘.

14

Góa chiū kín-kín chè-ap in ê kiû-siû; O̍at-tńg Góa ê chhiú, kong-kek in ê tùi-te̍k.

15

Òan-hūn Iâ-hô-hoa ê lâng, beh lâi tâu-hâng I, Chóng-sī in ê sî-tāi beh kú-tn̂g tī-teh.

16

I ia̍h beh ēng hó ê be̍h hō͘ in chia̍h; Góa ēng tùi chio̍h-pôaⁿ chhut ê bı̍t, hō͘ in chia̍h pá.