Si-phian 第 83 章 - 巴克禮全羅

1

A-sat ê si-koa.1) Siōng-tè ah, kiû Lí m̄-thang chēng-chēng; Siōng-tè ah, kiû Lí m̄-thang bô khui-chhùi, ia̍h m̄-thang bô chòe-siaⁿ;

2

In-ūi Lí ê tùi-te̍k hōa-hōa-jióng; Òan-hūn Lí ê lâng kia̍h-khí thâu.

3

In ēng kan-chà ê kè-bô͘ beh hāi Lí ê peh-sìⁿ; In saⁿ-kap gī-lūn, beh hāi Lí só͘ khǹg-ba̍t ê lâng.

4

In kóng, Lâi ah, lán lâi bia̍t-bô in, hō͘ in bōe chiâⁿ kok, Hō͘ Í-sek-lia̍t ê miâ bô koh hō͘ lâng kì-liām.

5

In tâng-sim saⁿ-kap chham-siông, Saⁿ-kap kiat-iok beh tí-te̍k Lí;

6

Chiū-sī khiā-khí pò͘-pîⁿ ê Í-tong kap Í-sı̍t-má-lī lâng, Mô͘-ap kap Hā-Kah lâng,

7

Ka-pa-le̍k, A-bûn, kap A-má-le̍k; Hui-lī-sū, í-kı̍p Chhui-lô khiā-khí ê peh-sìⁿ;

8

A-su̍t ia̍h kap in liân-ha̍p, In chòe Lô-tek ê kiáⁿ-sun ê pang-chhiú. [Sè-la̍h

9

Kiû Lí khóan-thāi in, chhin-chhiūⁿ chá khóan-thāi Bí-tiân; Chhin-chhiūⁿ tī Ki-sūn hô, khóan-thāi Se-se-lah kap Iâ-pin chı̍t-iūⁿ.

10

In tī Ún-tô-jíⁿ bia̍t-bô, Chiâⁿ-chòe tōe-chiūⁿ ê pùn-thô͘.

11

Kiû Lí hō͘ in ê léng-siù chhin-chhiūⁿ Ou-lı̍p kap Se-i-pek; Hō͘ in ê kun-tiúⁿ lóng chhin-chhiūⁿ Se-pa kap Sat-bûn-ná.

12

In kóng, Lán tio̍h chiong Siōng-tè khiā-khí ê só͘-chāi, Chiàm lâi chòe ka-kī ê.

13

Góa ê Siōng-tè ah, kiû Lí hō͘ in chhin-chhiūⁿ kńg-lê-hong ê tîn-ai, Chhin-chhiūⁿ hong-chêng ê tiū-sap;

14

Chhin-chhiūⁿ hé sio chhiū-nâ, Chhin-chhiūⁿ hé-iām sio soaⁿ-thâu.

15

Kiû Lí ia̍h chhin-chhiūⁿ án-ni ēng Lí ê kông-hong tui-kóaⁿ in, Ēng Lí ê tōa-hong hō͘ in kiaⁿ-hiâⁿ.

16

Iâ-hô-hoa ah, kiû Lí hō͘ in móa-bīn kiàn-siàu, Thang lâi kî-kiû Lí ê miâ.

17

Hō͘ in éng-óan kiàn-siàu, kiaⁿ-hiâⁿ; Hō͘ in làu-khùi bia̍t-bô.

18

Hō͘ in chai chí-ū Lí, miâ chòe Iâ-hô-hoa ê, Sī chôan-tōe-chiūⁿ chì-kôaiⁿ ê.