Si-phian 第 85 章 - 巴克禮全羅

1

Khó-la̍h ê hō͘-è ê si; kau hō͘ Ga̍k-koaⁿ.1) Iâ-hô-hoa ah, Lí í-keng si-un tī Lí ê tōe, Ngá-kok siū-lia̍h ê lâng, Lí kiù i tò-lâi.

2

Lí sià-bián Lí ê peh-sìⁿ ê chōe-ok, Lí jia-khàm in it-chhè ê chōe-kòa. [Sè-la̍h

3

Lí siu-hôe Lí it-chhè ê siū-khì, Soah Lí béng-lia̍t ê siū-khì.

4

Kiù góan ê Siōng-tè ah, kiû Lí hō͘ góan tò-tńg, Soah Lí ǹg góan ê siū-khì.

5

Lí beh siū-khì góan kàu éng-óan mah? Lí beh chiong Lí ê siū-khì lâu kàu bān-tāi mah?

6

Lí kiám m̄ koh chiong góan kiù o̍ah, Hō͘ Lí ê peh-sìⁿ in-ūi Lí lâi hoaⁿ-hí mah?

7

Iâ-hô-hoa ah, kiû Lí hō͘ góan khòaⁿ-kìⁿ Lí ê chû-ài; Koh chiong Lí ê kiù-un siúⁿ-sù góan.

8

Góa gōan thiaⁿ Chôan-lêng ê Iâ-hô-hoa só͘ beh kóng--ê; In-ūi I beh tùi I ê peh-sìⁿ, kap I sèng ê peh-sìⁿ, kóng pêng-an; Chóng-sī in m̄-thang koh khì lām-sám kiâⁿ.

9

I ê kiù-un sı̍t-chāi kūn tī kiaⁿ-ùi I ê lâng; Hō͘ êng-kng tiàm tī lán ê kéng-lāi.

10

Chû-ài kap chin-sı̍t saⁿ tú-tio̍h; Kong-gī kap pêng-an saⁿ chim-chhùi.

11

Chin-sı̍t tùi tōe--nih hoat-siⁿ, Kong-gī tùi thiⁿ khòaⁿ--lo̍h-lâi.

12

Iâ-hô-hoa beh siúⁿ-sù hó-mı̍h, Lán ê thó͘-tōe beh chhut i ê thó͘-sán.

13

Kong-gī beh kiâⁿ tī I ê thâu-chêng, Hō͘ I ê kha-jiah chiâⁿ-chòe lō͘.