Si-phian 第 86 章 - 巴克禮全羅

1

Tāi-pı̍t ê kî-tó.1) Iâ-hô-hoa ah, kiû Lí àⁿ hī-khang thiaⁿ góa; In-ūi góa sī khùn-khó͘ sòng-hiong ê.

2

Kiû Lí pó-chûn góa ê sìⁿ-miā, in-ūi góa sī khiân-sêng ê lâng. Góa ê Siōng-tè ah, Lí ê lô͘-po̍k óa-khò Lí; kiû Lí chín-kiù i.

3

Chú ah, kiû Lí lîn-bín góa; In-ūi góa thong-jı̍t kiû-kiò Lí.

4

Chú ah, kiû Lí hō͘ Lí ê lô͘-po̍k sim hoaⁿ-hí; In-ūi góa ēng góa ê sim gióng-bōng Lí.

5

Chú ah, in-ūi Lí sī hó, hoaⁿ-hí sià-bián lâng; Ū hong-sēng ê chû-ài, siúⁿ-sù hōan-nā kiû-kiò Lí ê lâng.

6

Iâ-hô-hoa ah, kiû Lí àⁿ hī-khang thiaⁿ góa ê kî-tó; Àⁿ-lo̍h thiaⁿ góa khún-kiû ê siaⁿ.

7

Tī góa hōan-lān ê jı̍t, beh kiû-kiò Lí; Lí beh ìn góa.

8

Chú ah, chiah ê siōng-tè ê tiong-kan, bô chı̍t-ê ōe pí-tit Lí; Lí ê só͘ chòe ia̍h bô thang pí-phēng.

9

Chú ah, Lí só͘ chō ê bān-pang lóng beh lâi phak-pài tī Lí ê bīn-chêng; In ia̍h beh êng-kng Lí ê miâ.

10

In-ūi Lí chòe tōa, koh kiâⁿ kî-biāu ê sū; Chí-ū Lí sī Siōng-tè.

11

Iâ-hô-hoa ah, kiû Lí chiong Lí ê tō-lō͘ chí-sī góa; góa beh chiàu Lí ê chin-lí lâi kiâⁿ; Hō͘ góa choan-it ê sim kèng-ùi Lí ê miâ.

12

Chú, góa ê Siōng-tè ah, góa beh chôan-sim o-ló Lí; Góa beh êng-kng Lí ê miâ kàu éng-óan.

13

In-ūi Lí tùi góa hoat-chhut tōa ê chû-ài, Lí kiù góa ê sìⁿ-miā bián lo̍h ke̍k-chhim ê im-kan.

14

Siōng-tè ah, kiau-ngō͘ ê lâng khí-lâi kong-kek góa; Koh ū kiông-pō ê tóng siàu-siūⁿ góa ê sìⁿ-miā; In bô kèng-hōng Lí tī in ê bīn-chêng.

15

Chú ah, Lí sī jîn-chû un-tián ê Siōng-tè; Bô khòai-khòai siū-khì, koh ū hong-sēng ê chû-ài kap sêng-sı̍t.

16

Kiû Lí o̍at--kè-lâi khòaⁿ góa, khó-lîn góa; Chiong Lí ê khùi-la̍t siúⁿ-sù Lí ê lô͘-po̍k, Kiù Lí ê lú-pī ê kiáⁿ.

17

Kiû Lí hián-chhut un-tián góa ê pîn-kù, Hō͘ òan-hūn góa ê lâng khòaⁿ-kìⁿ lâi kiàn-siàu; In-ūi Iâ-hô-hoa Lí pang-chān góa, an-ùi góa.