Si-phian 第 96 章 - 巴克禮全羅

1

Lín tio̍h ǹg Iâ-hô-hoa chhiùⁿ sin ê koa, Chôan-tōe lóng tio̍h ǹg Iâ-hô-hoa chhiùⁿ-koa.

2

Tio̍h ǹg Iâ-hô-hoa chhiùⁿ-koa, chiok-siā I ê miâ; Jı̍t-jı̍t thôan-pò I ê kiù-un.

3

Tī lia̍t-pang ê tiong-kan kóng-khí I ê êng-kng; Tī bān peh-sìⁿ ê tiong-kan kóng-khí I kî-biāu ê só͘-chòe.

4

In-ūi Iâ-hô-hoa chòe tōa, eng-kai siū ke̍k-tōa ê o-ló; I tī chèng sîn-bêng ê téng-bīn eng-kai siū kèng-ùi.

5

In-ūi lia̍t-pang ê siōng-tè lóng sī hu-ké; To̍k-to̍k Iâ-hô-hoa chhòng-chō chiah ê thiⁿ.

6

Tī I ê bīn-chêng ū chun-kùi kap ui-giâm; Tī I ê sèng-só͘ ū kôan-lêng kap êng-kng.

7

Peh-sìⁿ-tiong ê ta̍k-cho̍k ah, lín tio̍h chiong kôan-lêng êng-kng, Kui hō͘ Iâ-hô-hoa; kui hō͘ Iâ-hô-hoa.

8

Ēng I ê miâ só͘ eng-kai tit-tio̍h ê êng-kng, kui hō͘ Iâ-hô-hoa; Tòa lé-mı̍h lâi jı̍p I ê īⁿ.

9

Tio̍h ēng sèng-kiat ê chng-thāⁿ kèng-pài Iâ-hô-hoa; Chôan-tōe tī I ê bīn-chêng ngia̍uh-ngia̍uh-chhoah.

10

Tī lia̍t-pang-tiong tio̍h kóng, Iâ-hô-hoa chòe ông, Sè-kài kian-kò͘, bōe iô-tāng; I beh chiàu kong-pêng sím-phòaⁿ bān peh-sìⁿ.

11

Gōan thiⁿ hoaⁿ-hí, tōe khòai-lo̍k; Gōan hái kap kî-tiong só͘ chhiong-móa--ê lóng chhut tōa-siaⁿ;

12

Gōan chhân-hn̂g kap kî-tiong só͘-ū--ê lóng khòai-lo̍k; Hit-sî chhiū-nâ-lāi ê chhiū-ba̍k lóng beh tī Iâ-hô-hoa ê bīn-chêng chhut hoaⁿ-hí ê siaⁿ;

13

In-ūi I lâi lah, I lâi beh sím-phòaⁿ chôan-tōe; I beh chiàu kong-gī sím-phòaⁿ sè-kài, Chiàu I ê sìn-sı̍t sím-phòaⁿ bān peh-sìⁿ.