Si-phian 第 97 章 - 巴克禮全羅

1

Iâ-hô-hoa chòe ông; tōe tio̍h khòai-lo̍k; Chèng hái-sū tio̍h hoaⁿ-hí.

2

Ba̍t-hûn kap o͘-àm tī I ê sì-ûi; Gī-lí kap kong-pêng sī I pó-chō ê tōe-ki.

3

Hé kiâⁿ tī I ê bīn-chêng, Sio I sì-ûi ê tùi-te̍k.

4

I ê sih-nà chiò-kng sè-kài; Tōe khòaⁿ-kìⁿ, chiū tín-tāng.

5

Tī Iâ-hô-hoa ê bīn-chêng, chiū-sī chôan-tōe ê Chú ê bīn-chêng, Chiah ê soaⁿ siau-iûⁿ chhin-chhiūⁿ la̍h.

6

Chiah ê thiⁿ hián-bêng I ê gī, Lia̍t-pang khòaⁿ-kìⁿ I ê êng-kng.

7

Hōan-nā ho̍k-sāi tiau-khek ê ngó͘-siōng, Ēng hu-ké ê sîn chū-khoa--ê, lóng tio̍h siū kiàn-siàu; Lín chiah ê sîn ah, lóng tio̍h kèng-pài I;

8

Iâ-hô-hoa ah, in-ūi Lí ê phòaⁿ-tòan, Sek-an thiaⁿ-kìⁿ chiū hoaⁿ-hí, Iû-tāi ê siâⁿ ia̍h lóng khòai-lo̍k.

9

In-ūi Iâ-hô-hoa Lí sī chì-kôaiⁿ pôaⁿ-kè chôan-tōe; Lí sī chì-chun, pôaⁿ-kè chèng sîn-bêng.

10

Thiàⁿ Iâ-hô-hoa ê lâng, lín lóng tio̍h òan-hūn pháiⁿ; I pó-hō͘ I sèng ê peh-sìⁿ ê sìⁿ-miā; I chín-kiù in thoat-lī pháiⁿ-lâng ê chhiú.

11

Kng-bêng sī ūi-tio̍h gī-lâng lâi pī-pān, Hoaⁿ-hí sī ūi-tio̍h sim chèng-tı̍t ê lâng lâi pī-pān.

12

Gī-lâng ah, lín tio̍h in-ūi Iâ-hô-hoa lâi hoaⁿ-hí; Kì-liām I ê sèng-miâ lâi o-ló.