Khé-sī-lio̍k 第 10 章 - 巴克禮全羅

1

Góa koh khòaⁿ-kìⁿ pa̍t ê tōa khùi-la̍t ê thiⁿ-sài tùi thiⁿ kàng-lo̍h, chhēng hûn chòe saⁿ, thâu-khak téng ū khēng, i ê bīn chhin-chhiūⁿ jı̍t-thâu, kha chhin-chhiūⁿ hé-thiāu.

2

Chhiú tiong ū sòe-sòe kńg ê chheh, í-keng hian-khui ê, i chiàⁿ kha ta̍h tī hái-nı̍h, tò kha ta̍h tī tōe-nı̍h,

3

tōa siaⁿ âu-kiò, chhin-chhiūⁿ sai teh háu, i âu-kiò ê sî hit chhit ê lûi chiū chhut in ê siaⁿ.

4

Chhit ê lûi í-keng chhut siaⁿ, góa beh siá i; to̍k-to̍k thiaⁿ-kìⁿ tùi thiⁿ ū siaⁿ kóng, Chhit ê lûi só͘ kóng ê, lí tio̍h hong-ba̍t, bo̍h-tit siá i.

5

Góa só͘ khòaⁿ-kìⁿ khiā tī hái kap tōe-nı̍h ê thiⁿ-sài, kia̍h-khí i ê chiàⁿ chhiú ǹg thiⁿ,

6

kí chhòng-chō thiⁿ kap thiⁿ-nı̍h ê mı̍h, tōe kap tōe-nı̍h ê mı̍h, hái kap hái-nı̍h ê mı̍h, o̍ah kàu tāi-tāi bô kiông-chīn ê, lâi chiù-chōa kóng, í-āu bô koh ū sî-jı̍t;

7

to̍k-to̍k tī tē chhit ê thiⁿ-sài chhut siaⁿ ê jı̍t, tng i beh pûn hō-thâu ê sî, Siōng-tè ê ò-biāu chiū chiâⁿ, chiàu I só͘ thôan hō͘ I ê lô͘-po̍k, hiah ê sian-ti ê hok-im.

8

Góa chêng só͘ thiaⁿ-kìⁿ tùi thiⁿ ê siaⁿ, taⁿ koh thiaⁿ-kìⁿ i tùi góa kóng ōe, kóng, Hit ê khiā tī hái kap tōe-nı̍h ê thiⁿ-sài, chhiú-tiong só͘ the̍h hian-khui ê chheh, lí tio̍h khì the̍h i.

9

Góa sûi-sî khì chiū-kūn hit ê thiⁿ-sài, kā i kóng tio̍h ēng hit kńg sòe-sòe ê chheh hō͘ góa. I chiū kā góa kóng, Lí the̍h-khì chia̍h i; i beh hō͘ lí ê pak-tó͘ khó͘, tī lí ê chhùi-lāi beh tiⁿ chhin-chhiūⁿ bı̍t.

10

Góa chiū tùi hit ê thiⁿ-sài ê chhiú the̍h sòe kńg chheh lâi chia̍h i; tī góa chhùi-lāi kó-jiân tiⁿ chhin-chhiūⁿ bı̍t; í-keng thun-lo̍h-khì, góa ê pak-tó͘ chiū khó͘.

11

In kā góa kóng, Lí tio̍h koh chhàm-gú lâi lūn-khí chōe-chōe peh-sìⁿ, chōe-chōe pang kok, chōe-chōe khiuⁿ-kháu, chōe-chōe kun-ông ê sū.