Khé-sī-lio̍k 第 11 章 - 巴克禮全羅

1

Ū hō͘ góa chı̍t ki lô͘-tek chhin-chhiūⁿ kóaiⁿ-á, kóng, Lí khí-lâi, niû Siōng-tè ê tiān, kap chè-tôaⁿ, í-kı̍p tī hia kèng-pài ê lâng.

2

Tiān-gōa ê īⁿ pàng-hē teh, bo̍h-tit niû i; in-ūi í-keng hō͘ gōa-pang lâng; in beh thún-ta̍h sèng-siâⁿ, sì-cha̍p-jí ge̍h-jı̍t.

3

Góa beh siúⁿ-sù góa nn̄g ê kan-chèng ê, in beh chhēng môa-pò͘ thôan tō-lí, kiōng chı̍t-chheng nn̄g-pah la̍k-cha̍p jı̍t.

4

Che chiū-sī hit ê nn̄g châng kaⁿ-ná chhiū, kap nn̄g ê teng-tâi, chiū-sī khiā tī chôan tōe ê Chú ê bīn-chêng ê.

5

Nā ū lâng ài hāi in, chiū ū hé tùi in ê chhùi chhut-lâi, bia̍t in ê tùi-te̍k; nā ū lâng ài beh hāi in, tek-khak chhin-chhiūⁿ án-ni siū hāi-sí.

6

Chit nn̄g lâng ū kôan ōe koaiⁿ-ba̍t thiⁿ, tī in thôan tō-lí ê jı̍t, hō͘ i bô lo̍h hō͘; ia̍h ū kôan tī-lí chiah ê chúi, hō͘ i pìⁿ chòe huih; koh chiàu in só͘ ài, put-kóan sî thang ēng ta̍k iūⁿ ê chai-ē kong-kek tōe.

7

Kàu in kan-chèng bêng-pe̍k ê sî, tùi chhim-ian chiūⁿ-lâi ê siù beh kap in kau-chiàn, koh beh khah-iâⁿ lâi thâi in..

8

In ê sin-si tó tī tōa siâⁿ ê koe-lō͘; chit ê siâⁿ phì-jū chheng chòe Só͘-to-má kap Ai-kı̍p, chiū-sī in ê Chú tèng sı̍p-jī-kè ê só͘-chāi.

9

Koh tùi chiah ê peh-sìⁿ, chiah ê chong-cho̍k, chiah ê khiuⁿ-kháu, chiah ê pang-kok ê tiong-kan ū lâng saⁿ jı̍t pòaⁿ kú khòaⁿ in ê sin-si, koh m̄ chún bâi-chòng in ê sin-si tī bōng-nı̍h.

10

Khiā-khí tōe-bīn-chiūⁿ ê lâng chiū ūi-tio̍h in hoaⁿ-hí khòai-lo̍k, ēng mı̍h saⁿ-sàng; in-ūi chit nn̄g ê sian-ti bat khùn-khó͘ khiā-khí tōe-bīn-chiūⁿ ê lâng.

11

Kè hit saⁿ jı̍t pòaⁿ, ū o̍ah ê khì, tùi Siōng-tè chhut ê, lâi jı̍p tī in; in chiū peh-khí-lâi khiā; khòaⁿ-kìⁿ in ê lâng tōa kiaⁿ.

12

In chiū thiaⁿ-kìⁿ tùi thiⁿ ū tōa siaⁿ, kā in kóng, Chiūⁿ lâi chia; in chiū chē hûn chiūⁿ thiⁿ, in ê tùi-te̍k ia̍h khòaⁿ-kìⁿ in.

13

Tng hit sî, tōe ū tōa tín-tāng, siâⁿ tó cha̍p hūn ê chı̍t hūn; in-ūi tōe-tāng lâi sí ê lâng, ū chhit-chheng miâ; kî-û ê lóng kiaⁿ-hiâⁿ, lâi kui êng-kng hō͘ thiⁿ-nı̍h ê Siōng-tè.

14

Tē jī ê chai-ē í-keng kè-khì; tē saⁿ ê chai-ē kín-kín kàu.

15

Tē chhit ê thiⁿ-sài pûn hō-thâu, chiū tī thiⁿ-nı̍h ū chiah ê tōa ê siaⁿ, teh kóng, Sè-kan ê kok chiâⁿ-chòe lán ê Chú kap I ê Ki-tok ê kok; I beh chòe ông kàu tāi-tāi bô chīn.

16

Tī Siōng-tè ê bīn-chêng, chē tī in chō-ūi ê jī-cha̍p-sì ê tiúⁿ-ló, bīn phak-lo̍h-lâi pài Siōng-tè,

17

kóng, Chú Siōng-tè ah, sī chôan-lêng ê, hiān-chāi tī-teh, chá tī-teh ê; góan kám-siā lí, in-ūi lí í-keng chiáng lí ê tōa kôan lâi chòe ông.

18

Gōa-pang hoat-chhut siū-khì, lí ê siū-khì ia̍h lîm-kàu; sí ê lâng siū sím-phòaⁿ, koh lí ê lô͘-po̍k chiah ê sian-ti, kap chiah ê sèng ê, kap kèng-ùi lí ê miâ ê, bô lūn tōa sòe, lí ēng pò-siúⁿ hō͘ in; koh pāi-hōai tōe ê, lí ia̍h pāi-hōai in; hit ê sî kàu lah.

19

Siōng-tè ê tiān, tī thiⁿ-nı̍h ê, chiū khui; tī I ê tiān-lāi I ê iok-kūi khòaⁿ hiān-hiān; chiū ū sih-nà, kap siaⁿ, kap lûi tân, tōe-tāng, í-kı̍p tōa phauh.