Khé-sī-lio̍k 第 12 章 - 巴克禮全羅

1

Koh ū tōa tiāu-thâu chhut-hiān tī thiⁿ-nı̍h, chı̍t ê hū-jîn-lâng sin-khu chhēng jı̍t-thâu, i ê kha-ē ū ge̍h, thâu-khak tì cha̍p-jī lia̍p chhiⁿ ê bián-liû;

2

ia̍h ū hôai-īn; in-ūi beh siⁿ kiáⁿ ê kan-khó͘, thàng-thiàⁿ, chiū âu-kiò.

3

Koh ū pa̍t ê tiāu-thâu chhut-hiān tī thiⁿ-nı̍h; ū tōa bé chhiah-sek ê lêng, chhit ê thâu, cha̍p ki kak, thâu-khak tì chhit téng ông-bō.

4

I ê bé thoa thiⁿ-téng ê chhiⁿ saⁿ hūn ê chı̍t hūn, tūi lo̍h tōe. Lêng khiā tī beh siⁿ kiáⁿ ê hū-jîn-lâng ê bīn-chêng, thèng-hāu i siⁿ-liáu, chiū beh thun i ê kiáⁿ.

5

Hū-jîn-lâng siⁿ ta-po͘-kiáⁿ, chiū-sī beh ēng thih-kóaiⁿ tī-lí bān pang ê. I ê kiáⁿ siū tòa kàu tī Siōng-tè í-kı̍p I ê chō-ūi.

6

Hū-jîn-lâng chiū cháu-khì khòng-iá, tī hia ū Siōng-tè só͘ pī-pān ê só͘-chāi, hō͘ i tī hia tit-tio̍h iúⁿ-chhī chı̍t-chheng nn̄g-pah la̍k-cha̍p jı̍t.

7

Tī thiⁿ-nı̍h chiū ū kau-chiàn, Bí-ka-le̍k chhōa i ê chhe-sài khì kap lêng kau-chiàn; lêng ia̍h chhōa i ê chhe-sài khì kau-chiàn,

8

bōe ōe iâⁿ, tī thiⁿ-nı̍h in chiū bô koh ū só͘-chāi.

9

Hit bé tōa lêng chiū siū hiat-lo̍h, chiū-sī lāu chôa, chheng chòe Mô͘-kúi, ia̍h chheng chòe Sat-tàn, bê-he̍k phó͘ thiⁿ-ē ê, i siū hiat-lo̍h tī tōe-nı̍h, i ê chhe-sài ia̍h kap i siū hiat-lo̍h.

10

Góa chiū thiaⁿ-kìⁿ tī thiⁿ-nı̍h ū tōa siaⁿ, kóng, Lán ê Siōng-tè ê chín-kiù kap kôan-lêng kap kok, í-kı̍p I ê Ki-tok ê kôan, taⁿ lóng kàu lah; in-ūi khòng-kò lán ê hiaⁿ-tī ê, chiū-sī mî-jı̍t tī lán ê Siōng-tè ê bīn-chêng khòng-kò in ê, taⁿ í-keng siū hiat-lo̍h lah.

11

In in-ūi Iûⁿ-ko ê huih, kap in só͘ kan-chèng ê tō-lí, lâi khah-iâⁿ i; sui-jiân kàu sí, ia̍h bô thiàⁿ-sioh in ê sìⁿ-miā.

12

Só͘-í chiah ê thiⁿ kap khiā-khí tī hit tiong-kan ê, lín tio̍h hoaⁿ-hí; nā-sī tōe kap hái ū chai-ē, in-ūi Mô͘-kúi í-keng lo̍h kàu lín hia, ū tōa siū-khì, in-ūi chai i ê sî bô jōa kú.

13

Lêng khòaⁿ-kìⁿ pún-sin siū hiat tī tōe-nı̍h, chiū khún-tio̍k hit ê siⁿ ta-po͘-kiáⁿ ê hū-jîn-lâng.

14

Chiū ū tōa eng ê nn̄g ki sı̍t hō͘ hū-jîn-lâng, hō͘ i pe khì khòng-iá, kàu i ê só͘-chāi, lī-khui chôa ê bīn-chêng; tī hia tit-tio̍h iúⁿ-chhī, chı̍t kî-hāu, koh nn̄g kî-hāu, koh pòaⁿ kî-hāu.

15

Chôa tī hū-jîn-lâng ê āu-bīn, tùi i ê chhùi thò͘-chhut chúi chhin-chhiūⁿ hô, beh kā i lâu-khì.

16

Tōe pang-chān hū-jîn-lâng; chiū khui chhùi thun lêng só͘ thò͘-chhut ê hô-chúi.

17

Lêng siū-khì hū-jîn-lâng, chiū khì kap hū-jîn-lâng kî-û ê hō͘-è kau-chiàn, chiū-sī siú Siōng-tè ê kài, ū Iâ-so͘ ê kan-chèng ê; hit sî lêng chiū khiā tī hái-piⁿ ê soa-téng.