Khé-sī-lio̍k 第 13 章 - 巴克禮全羅

1

Góa koh khòaⁿ-kìⁿ chı̍t chiah siù, tùi hái-nı̍h khí-lâi, ū cha̍p ki kak, chhit ê thâu, hiah ê kak tì cha̍p téng ông-bō; thâu-khak téng ū pòng-to̍k ê miâ.

2

Góa só͘ khòaⁿ-kìⁿ ê siù chhin-chhiūⁿ pà, i ê kha chhin-chhiūⁿ hîm ê kha, chhùi chhin-chhiūⁿ sai ê chhùi. Lêng ēng i ê châi-lêng, i ê chō-ūi, kap tōa kôan hō͘ i.

3

Góa ia̍h khòaⁿ-kìⁿ hiah ê thâu-khak ê chı̍t-ê, chhin-chhiūⁿ siū thâi kàu sí, i tì-kàu sí ê siong tit-tio̍h i-hó; thong sè-kài kî-kòai lâi tè hit chiah siù;

4

koh pài lêng, in-ūi i bat ēng kôan hō͘ siù; ia̍h pài siù, kóng, Chī-chūi chhin-chhiūⁿ siù ah? koh chī-chūi ōe kap i kau-chiàn ah?

5

Koh ū chı̍t ê chhùi hō͘ i, teh kóng tōa sū kap pòng-to̍k ê ōe; koh ū hō͘ i kôan lâi kiâⁿ tāi-chì sì-cha̍p-jī ge̍h-jı̍t.

6

I chiū khui chhùi, kóng-chhut pòng-to̍k Siōng-tè ê ōe, lâi pòng-to̍k I ê miâ, kap I ê hōe-bō͘, kap hiah ê tiàm tī thiⁿ-nı̍h ê.

7

Koh ū hō͘ i kôan, thang kap sèng-tô͘ kau-chiàn, lâi khah-iâⁿ in; koh ū hō͘ i kôan lâi tī-lí ta̍k chióng-cho̍k, ta̍k hō peh-sìⁿ, ta̍k hō khiuⁿ-kháu, ta̍k pang-kok.

8

Khiā-khí tōe-bīn-chiūⁿ ê lâng, in ê miâ bô kì tī o̍ah-miā chheh ê, lóng beh pài siù; chit ê chheh chiū-sī tùi chhòng-chō sè-kan ê sî siū thâi ê Iûⁿ-ko ê.

9

Hōan-nā ū hī-khang ê tio̍h thiaⁿ.

10

Nā ū lia̍h lâng ê, ia̍h beh hō͘ lâng lia̍h; ēng to thâi lâng ê, ia̍h beh siū to thâi; sèng-tô͘ ê thun-lún kap sìn chāi-tī chit-ê.

11

Góa koh khòaⁿ-kìⁿ pa̍t chiah siù tùi tōe-nı̍h khí-lâi, ū nn̄g ki kak chhin-chhiūⁿ iûⁿ-ko, i ê kóng ōe chhin-chhiūⁿ lêng.

12

Koh chiong thâu-chı̍t chiah siù ê kôan, lóng kiâⁿ tī i ê bīn-chêng. Koh hō͘ tōe kap khiā-khí tōe-chiūⁿ ê lâng pài thâu-chı̍t chiah siù; chiū-sī hit chiah tú-tio̍h tì-kàu sí ê siong, koh tit-tio̍h i-hó ê.

13

Koh kiâⁿ tōa sîn-jiah, sīm-chì tī lâng ê bīn-chêng hō͘ hé kàng-lo̍h tōe.

14

Koh tùi i só͘ tit-tio̍h kiâⁿ tī siù ê bīn-chêng chiah ê sîn-jiah, lâi bê-he̍k khiā-khí tōe-chiūⁿ ê lâng; kā khiā-khí tōe-chiūⁿ ê lâng kóng, tio̍h kā hit chiah tú-tio̍h to siong iû-gôan o̍ah-teh ê siù chòe siōng.

15

Koh ū kôan hō͘ i thang ēng o̍ah-khì jı̍p tī siù ê siōng; hō͘ siù ê siōng ōe kóng ōe, ia̍h hō͘ kìⁿ-nā bô pài siù ê siōng ê tú-tio̍h thâi.

16

I ia̍h hō͘ chèng lâng; bô lūn tōa sòe, hó-gia̍h sòng-hiong, chū-iû ê, chòe lô͘-po̍k ê, lóng siū khàm-ìn ê kì-hō, he̍k-sī tī chiàⁿ chhiú, á-sī tī thâu-hia̍h.

17

Lâng nā bô hit ê khàm-ìn ê kì-hō, chiū-sī siù ê miâ, á-sī i ê miâ siàu-gia̍h, chiū bōe tit-tio̍h bóe-bōe.

18

Tì-sek chāi-tī che; ū chhang-miâ ê, tio̍h sǹg siù ê siàu-gia̍h; in-ūi sī lâng ê siàu-gia̍h; i ê siàu-gia̍h chiū-sī la̍k-pah la̍k-cha̍p-la̍k.