Khé-sī-lio̍k 第 15 章 - 巴克禮全羅

1

Góa koh khòaⁿ-kìⁿ pa̍t ê tiāu-thâu tī thiⁿ-nı̍h, tōa koh kî-kòai, chiū-sī chhit ê thiⁿ-sài ū chiáng chhit hāng chai-ē; chiū-sī lō͘-bé ê, in-ūi Siōng-tè ê tōa siū-khì tùi chiah-ê lâi chīn.

2

Góa koh khòaⁿ-kìⁿ po-lê kap hé saⁿ-chham ê hái; koh khòaⁿ-kìⁿ hiah ê tek-sèng lâi thoat-lī siù, kap i ê siōng, í-kı̍p i ê miâ ê siàu-gia̍h ê, khiā tī po-lê hái, lóng the̍h Siōng-tè ê khîm.

3

Gîm Siōng-tè lô͘-po̍k Mô͘-se ê si, kap Iûⁿ-ko ê si, kóng, Chú Siōng-tè, chôan-lêng ê ah, lí ê só͘ chòe tōa koh kî-kòai; le̍k sè-tāi ê Ông ah, lí ê tō-lō͘ gī koh chin-sı̍t.

4

Chú ah, chī-chūi m̄ kèng-ùi kui êng-kng lí ê miâ ah? in-ūi to̍k-to̍k lí sī sèng; lia̍t-pang beh lóng lâi kèng-pài tī lí ê bīn-chêng, in-ūi lí kong-gī ê só͘ kiâⁿ í-keng hián-bêng.

5

Chiah ê tāi-chì liáu-āu, góa khòaⁿ-kìⁿ, tī thiⁿ-nı̍h hit ê chòe chèng-kù ê hōe-bō͘ ê tiān í-keng khui.

6

Hiah ê chhit ê thiⁿ-sài, ū teh chiáng chhit hāng chai-ē ê, tùi tiān chhut-lâi, seng-khu chhēng pó-chio̍h, chheng-liāng koh kng-bêng, heng-khám hâ kim tòa.

7

Sì ê o̍ah mı̍h ê chı̍t ê chiong chhit ê kim óaⁿ hō͘ hit chhit ê thiⁿ-sài, lāi-bīn tóe-móa hit ê o̍ah kàu tāi-tāi bô chīn ê Siōng-tè ê tōa siū-khì.

8

Tùi Siōng-tè ê êng-kng kap I ê kôan-lêng, chiū tiān-nı̍h ū ian móa-móa. Koh bô lâng ōe jı̍p tiān, thèng-hāu kàu chhit ê thiⁿ-sài chhit hāng ê chai-ē kiâⁿ chīn.