Khé-sī-lio̍k 第 16 章 - 巴克禮全羅

1

Góa thiaⁿ-kìⁿ ū tōa siaⁿ tùi tiān-nı̍h chhut, kā chhit ê thiⁿ-sài kóng, Lín khì, chiong hiah ê tóe Siōng-tè tōa siū-khì ê chhit ê óaⁿ, piàⁿ tī tōe-nı̍h.

2

Thâu-chı̍t ê chiū khì, chiong i ê óaⁿ piàⁿ tī tōe-nı̍h; chiū ū ok-to̍k ê chhng siⁿ tī hiah ê ū siù ê kì-hō ê, kap pài i ê siōng ê.

3

Tē jī ê chiong i ê óaⁿ piàⁿ tī hái-nı̍h; hái chiū pìⁿ chòe chhin-chhiūⁿ sí-lâng ê huih, hái-tiong ê o̍ah mı̍h it-chīn sí.

4

Tē saⁿ ê chiong i ê óaⁿ piàⁿ tī kang-hô kap chiah ê chúi chôaⁿ; chúi chiū pìⁿ chòe huih.

5

Góa thiaⁿ-kìⁿ chiáng chiah ê chúi ê thiⁿ-sài kóng, Hiān-chāi tī-teh, chá tī-teh, sèng ê ah, lí sī kong-gī, in-ūi lí án-ni sím-phòaⁿ.

6

In-ūi in bat lâu sèng-tô͘ kap sian-ti ê huih; taⁿ lí ēng huih hō͘ in lim, sī in só͘ eng-kai ê.

7

Góa koh thiaⁿ-kìⁿ chè-tôaⁿ teh kóng, Chú Siōng-tè, chôan-lêng ê ah, sī ah; lí ê sím-phòaⁿ sī chin-sı̍t koh kong-gī.

8

Tē sì ê chiong i ê óaⁿ piàⁿ tī jı̍t-thâu; chiū hō͘ jı̍t-thâu ōe ēng hé pek lâng.

9

Lâng siū tōa ê iām-jia̍t só͘ pek, chiū pòng-to̍k hit ê ū kôan teh chiáng-lí chiah ê chai-ē ê Siōng-tè ê miâ, koh bô hóan-hóe lâi kui êng-kng I.

10

Tē gō͘ ê chiong i ê óaⁿ piàⁿ tī siù ê chō-ūi; siù ê kok sûi-sî o͘-àm.

11

Lâng in-ūi kan-khó͘ chiū kā in ê chı̍h; koh in-ūi in ê kan-khó͘ kap in ê chhng-to̍k, chiū pòng-to̍k thiⁿ-nı̍h ê Siōng-tè, iā bô hóan-hóe in ê só͘ kiâⁿ.

12

Tē la̍k ê chiong i ê óaⁿ piàⁿ tī Pek-lat tōa hô; i ê chúi liâm-piⁿ ta-khì, beh ūi-tio̍h tang-hng ê lia̍t-ông lâi pī-pān lō͘.

13

Góa koh khòaⁿ-kìⁿ ū saⁿ ê ù-òe ê sîn, chhin-chhiūⁿ chhân-kap-á tùi lêng ê chhùi, kap siù ê chhùi, kap ké sian-ti ê chhùi chhut-lâi.

14

In chiū-sī chiah ê kúi ê sîn, ōe kiâⁿ sîn-jiah ê, chhut-lâi chiū-kūn phó͘-thiⁿ-ē ê ông, chio-chı̍p in tī chôan-lêng Siōng-tè ê tōa jı̍t-kî ê kau-chiàn.

15

(Lí khòaⁿ, góa lâi chhin-chhiūⁿ chha̍t; kéng-séng lâi kò͘-siú i ê saⁿ, bián-tit thǹg-theh lâi kiâⁿ, hō͘ lâng khòaⁿ-kìⁿ i ê kiàn-siàu ê, chiū ū hok-khì.)

16

Hit saⁿ ê chiū chio-chı̍p lia̍t-ông tī chı̍t ê só͘-chāi, Hi-pek-lâi ê im kiò chòe A-má-ge̍k-tùn.

17

Tē chhit ê chiong i ê óaⁿ piàⁿ tī khong-khì; chiū ū tōa siaⁿ tùi tiān-lāi tùi chō-ūi chhut, kóng, Chiâⁿ lah.

18

Chiū ū sih-nà, ū siaⁿ, ū lûi tân, tōe ia̍h tōa tín-tāng, tùi tōe-chiūⁿ ū lâng kàu taⁿ, bē ū tōe-tāng chhin-chhiūⁿ án-ni ê tōa.

19

Tōa siâⁿ chiū lı̍h chòe saⁿ ê, lia̍t-pang chiah ê siâⁿ ia̍h tó-hōai; Siōng-tè ia̍h kì-tit tōa siâⁿ Pa-pí-lûn, chiū chiong poe tóe I ke̍k tōa siū-khì ê chiú hō͘ i.

20

Ta̍k ê hái-sū lóng tô-cháu, chiah ê soaⁿ lóng bô-khì.

21

Koh ū tōa phauh tùi thiⁿ kàng-lo̍h tī lâng, ta̍k lia̍p tāng kúi-nā cha̍p kun; lâng in-ūi phauh ê chai-ē, chiū pòng-to̍k Siōng-tè, in-ūi hit ê chai-ē chin tōa.