Khé-sī-lio̍k 第 5 章 - 巴克禮全羅

1

Góa khòaⁿ-kìⁿ chē tī chō-ūi ê, chiàⁿ chhiú the̍h chı̍t kńg, lāi-gōa lóng ū bûn-jī, ēng chhit ê ìn hong-ba̍t.

2

Koh khòaⁿ-kìⁿ ū kôan-lêng ê thiⁿ-sài, tōa siaⁿ soan-thôan kóng, Chī-chūi ōe kham-tit khui hit kńg, lâi thiah-khui i ê ìn.

3

Tī thiⁿ-nı̍h, kap tōe-nı̍h, kap tōe ê ē-bīn, bô chı̍t-ê ōe khui hit kńg, á-sī khòaⁿ i.

4

Kì-jiân chhē bô chı̍t-ê ōe kham-tit khui hit kńg, á-sī khòaⁿ i ê, góa chiū tōa thî-khàu.

5

Hiah ê tiúⁿ-ló ê chı̍t-ê kā góa kóng, Bo̍h-tit thî-khàu; lí khòaⁿ, Iû-tāi chi-phài ê sai, Tāi-pı̍t ê kun-thâu, í-keng tek-sèng, thang lâi khui chit kńg, kap hiah ê chhit ê ìn.

6

Góa chiū khòaⁿ-kìⁿ tī chō-ūi kap sì ūi ê o̍ah mı̍h ê tiong-kan, kap tī hiah ê tiúⁿ-ló ê tiong-kan, ū Iûⁿ-ko khiā-teh, chhin-chhiūⁿ bat siū thâi, ū chhit ki kak, chhit lúi ba̍k-chiu, chiū-sī Siōng-tè ê chhit ê Sîn, hōng-chhe kàu phó͘ thiⁿ-ē ê.

7

I chiū chìn-chêng, tùi hit ê chē tī chō-ūi ê ê chiàⁿ chhiú the̍h hit kńg.

8

I the̍h hit kńg ê sî, chiū sì ê o̍ah mı̍h kap jī-cha̍p-sì ê tiúⁿ-ló, lóng phak tī Iûⁿ-ko ê bīn-chêng; ta̍k-ê ū khîm kap kim lô͘, tóe hiuⁿ móa-móa, hiuⁿ chiū-sī sèng-tô͘ ê kî-tó.

9

Iā gîm sin ê si kóng, Lí kham-tit the̍h hit kńg, lâi khui i ê ìn; in-ūi lí siū thâi, bat ēng lí ê huih tùi ta̍k cho̍k, ta̍k khiuⁿ-kháu, ta̍k hō peh-sìⁿ, ta̍k kok, bóe lâng lâi kui Siōng-tè;

10

hō͘ in chòe kok, chòe chè-si, lâi ho̍k-sāi Siōng-tè; in ia̍h beh chòe ông tī tōe-chiūⁿ.

11

Góa koh khòaⁿ, chiū thiaⁿ-kìⁿ chō-ūi, kap o̍ah mı̍h, kap tiúⁿ-ló ê chiu-ûi chōe-chōe thiⁿ-sài ê siaⁿ; in ê gia̍h-siàu chheng-chheng bān-bān;

12

tōa siaⁿ kóng, Siū thâi ê Iûⁿ-ko, ha̍p-gî tit-tio̍h kôan-lêng, pù-ū, tì-hūi, khùi-la̍t, chun-kùi, êng-kng, o-ló.

13

Koh thiaⁿ-kìⁿ tī thiⁿ tī tōe, kap tōe ê ē-bīn, kap hái-bīn, it-chhè siū chō ê mı̍h, kap kî-tiong hōan só͘ ū ê, lóng kóng, O-ló, chun-kùi, êng-kng, kôan-sè, lóng kui hō͘ chē tī chō-ūi ê, kap Iûⁿ-ko, kàu tāi-tāi bô chīn.

14

Sì ê o̍ah mı̍h kóng, À-bēng; hiah ê tiúⁿ-ló chiū phak-teh pài.