Khé-sī-lio̍k 第 6 章 - 巴克禮全羅

1

Iûⁿ-ko khui chhit ê ìn ê chı̍t ê, hit sî góa teh khòaⁿ, chiū thiaⁿ-kìⁿ sì ê o̍ah mı̍h ê chı̍t-ê, i ê siaⁿ chhin-chhiūⁿ lûi, kóng, Lâi ah.

2

Góa chiū khòaⁿ, ū pe̍h bé, khiâ i ê ū kia̍h keng, ia̍h ū bián-liû hō͘ i; i chiū chhut-khì tek-sèng, koh beh tek-sèng.

3

Khui tē jī ê ìn ê sî, góa thiaⁿ-kìⁿ tē jī ê o̍ah mı̍h kóng, Lâi ah.

4

Koh ū chı̍t chiah bé chhut lâi, sī chhiah ê, ū kôan-pèng hō͘ hit ê khiâ bé ê, tùi tōe-chiūⁿ chhiúⁿ-to̍at hô-pêng, hō͘ lâng saⁿ-thâi; koh ū chiong tōa ki to hō͘ i.

5

Khui tē saⁿ ê ìn ê sî, góa thiaⁿ-kìⁿ tē saⁿ ê o̍ah mı̍h kóng, Lâi ah. Góa chiū khòaⁿ, ū o͘ bé, khiâ i ê, chhiú kia̍h chhìn.

6

Góa thiaⁿ-kìⁿ sì ê o̍ah mı̍h ê tiong-kan chhin-chhiūⁿ ū siaⁿ kóng, Be̍h chı̍t chin chı̍t ê gûn-á, tōa-be̍h saⁿ chin iā chı̍t ê gûn-á; iû kap chiú m̄ thang phah pháiⁿ.

7

Khui tē sì ê ìn ê sî, góa thiaⁿ-kìⁿ tē sì ê o̍ah mı̍h ê siaⁿ kóng, Lâi ah.

8

Góa chiū khòaⁿ, ū hé-hu-sek ê bé; khiâ i ê, i ê miâ kiò chòe Sí; Im-hú tè i ê āu-bīn tâng kiâⁿ; ū kôan-pèng hō͘ in, thang tī-lí tōe-chiūⁿ ê sì hūn chı̍t; ēng to-kiàm, ki-hng, un-e̍k, kap tōe-chiūⁿ ê iá-siù lâi bia̍t i.

9

Khui tē gō͘ ê ìn ê sî, góa khòaⁿ-kìⁿ chè-tôaⁿ ê, ū ūi-tio̍h Siōng-tè ê tō-lí, kap ūi-tio̍h in só͘ chip-siú ê kan-chèng, lâi siū thâi ê lâng ê lêng-hûn;

10

tōa siaⁿ âu-kiò kóng, Sèng, koh chin ê Chú-cháiⁿ ah, lí bô sím-phòaⁿ tiàm tī tōe-chiūⁿ ê lâng, lâi sin góan lâu huih ê oan, beh kàu sím-mı̍h sî ah?

11

Chiū ū pe̍h saⁿ hō͘ in ta̍k lâng, koh kā in kóng, tio̍h chhiáⁿ hioh tām-po̍h kú, thèng-hāu tâng chòe lô͘-po̍k ê kap hiaⁿ-tī, chiū-sī beh chhin-chhiūⁿ in siū thâi ê, siàu-gia̍h it-chīn móa.

12

Góa khòaⁿ I khui tē 6 ê ìn ê sî, tōe tōa tín-tāng, jı̍t pìⁿ o͘ chhin-chhiūⁿ mô͘-o͘-pò͘, ge̍h kui-ê chhin-chhiūⁿ huih;

13

thiⁿ chhiⁿ tūi-lo̍h tōe, chhin-chhiūⁿ bû-hoa-kó chhiū hō͘ tōa hong só͘ iô, lak bē se̍k ê ké-chí chı̍t iūⁿ.

14

Thiⁿ chiū tú-tio̍h chhian-sóa, chhin-chhiūⁿ chhat kńg-khí-lâi; soaⁿ kap hái-sū lóng cháu-cho̍ah.

15

Tōe-chiūⁿ chiah ê ông, tāi-hu, chhian-chóng, pù lâng, béng lâng, í-kı̍p lóng-chóng chòe lô͘-po̍k ê, chū-iû ê, ka-kī bih tī soaⁿ-tōng soaⁿ-giâm.

16

Tùi soaⁿ kap giâm kóng, Teh tī góan ê téng-bīn, jia-khàm góan, thang siám-pī hit ê chē tī chō-ūi ê ê bīn, kap Iûⁿ-ko ê siū-khì.

17

In-ūi in siū-khì ê tōa jı̍t í-keng kàu lah, chī-chūi khiā ōe tiâu ah?