Khé-sī-lio̍k 第 7 章 - 巴克禮全羅

1

Chiah ê tāi-chì liáu-āu góa khòaⁿ-kìⁿ sì ê thiⁿ-sài khiā tī tōe ê sì kak-thâu, chip-chiáng tōe ê sì-bīn hong, hō͘ i bô chhe tī tōe, tī hái, kap it-khài ê chhiū.

2

Koh khòaⁿ-kìⁿ pa̍t ê thiⁿ-sài tùi jı̍t-chhut ê só͘-chāi chiūⁿ-lâi, the̍h chin-o̍ah Siōng-tè ê ìn; tùi hiah ê tit-tio̍h kôan, lâi siong-hāi tōe kap hái, sì ê thiⁿ-sài tōa siaⁿ kiò, kóng,

3

Tōe kap hái kap chhiū lín bo̍h-tit siong-hāi, thèng-hāu góan khàm-ìn tī lán ê Siōng-tè ê lô͘-po̍k ê thâu-hia̍h.

4

Góa chiū thiaⁿ-kìⁿ siū khàm-ìn ê ê siàu-gia̍h; Í-sek-lia̍t ê kiáⁿ-sun chèng chi-phài ê tiong-kan siū khàm-ìn ê, kiōng ū cha̍p-sì-bān sì-chheng.

5

Sio̍k Iû-tāi ê chi-phài siū khàm-ìn ê, chı̍t-bān nn̄g-chheng: Sio̍k Liû-piān ê chi-phài, chı̍t-bān nn̄g-chheng: Sio̍k Ka-tek ê chi-phài, chı̍t-bān nn̄g-chheng:

6

Sio̍k A-siat ê chi-phài, chı̍t-bān nn̄g-chheng: Sio̍k La̍p-tāi-lī ê chi-phài, chı̍t-bān nn̄g-chheng: Sio̍k Má-ná-se ê chi-phài, chı̍t-bān nn̄g-chheng:

7

Sio̍k Se-biān ê chi-phài, chı̍t-bān nn̄g-chheng: Sio̍k Lī-bī ê chi-phài, chı̍t-bān nn̄g-chheng: Sio̍k Í-sat-ka ê chi-phài, chı̍t-bān nn̄g-chheng:

8

Sio̍k Se-pò͘-lûn ê chi-phài, chı̍t-bān nn̄g-chheng: Sio̍k Iok-sek ê chi-phài, chı̍t-bān nn̄g-chheng: Sio̍k Piān-ngá-bín ê chi-phài, chı̍t-bān nn̄g-chheng.

9

Chiah ê tāi-chì liáu-āu, góa khòaⁿ-kìⁿ ū kui tōa tīn ê lâng, bô lâng ōe sǹg i ê siàu-gia̍h, chhut tī ta̍k kok, ta̍k cho̍k, ta̍k hō peh-sìⁿ, ta̍k iūⁿ khiuⁿ-kháu ê, khiā tī chō-ūi ê bīn-chêng, chhēng pe̍h saⁿ, chhiú kia̍h chang-chhiū ki;

10

tōa siaⁿ kiò kóng, Gōan chín-kiù kui tī lán ê Siōng-tè, chiū-sī chē chō-ūi ê, kap tī Iûⁿ-ko.

11

Chèng thiⁿ-sài khiā tī chō-ūi kap tiúⁿ-ló kap sì ê o̍ah-mı̍h ê chiu-ûi, bīn phak tī chō-ūi chêng, kèng-pài Siōng-tè, kóng, À-bēng:

12

Gōan o-ló, êng-kng, tì-hūi, kám-siā, chun-kùi, kôan-lêng, khùi-la̍t kui tī lán ê Siōng-tè, kàu tāi-tāi bô chīn. À-bēng.

13

Tiúⁿ-ló ê tiong-kan ū chı̍t ê ìn góa kóng, Chiah ê chhēng pe̍h saⁿ ê sī chī-chūi? tùi tá-lo̍h lâi ah?

14

Góa kā i kóng, Góa ê Chú ah, lí chai. I kā góa kóng, Chiah-ê sī tùi hit ê tōa ê hōan-lān chhut-lâi ê, bat tī Iûⁿ-ko ê huih sóe in ê saⁿ kàu pe̍h-pe̍h.

15

Só͘-í in tī Siōng-tè ê chō-ūi chêng, koh tī I ê tiān mî-jı̍t ho̍k-sāi I; chē tī chō-ūi ê beh khiā-khí tī in ê tiong-kan, lâi tì-ìm in.

16

In bô koh iau, iā bô koh chhùi-ta; jı̍t kap it-chhè ê jia̍t bōe pek-tio̍h in.

17

In-ūi chō-ūi tiong ê Iûⁿ-ko beh chòe in ê bo̍k-chiá, chhōa in kàu o̍ah ê chúi-chôaⁿ; koh Siōng-tè beh tùi in ê ba̍k-chiu chhit-khì in lóng-chóng ê ba̍k-sái.