Khé-sī-lio̍k 第 8 章 - 巴克禮全羅

1

Khui tē chhit ê ìn ê sî, thiⁿ-nı̍h chēng-chēng, iok-lio̍k pòaⁿ-tiám cheng kú.

2

Góa khòaⁿ-kìⁿ hiah ê khiā tī Siōng-tè ê bīn-chêng chhit ê thiⁿ-sài; koh ū chhit ki hō-thâu hō͘ in.

3

Iā ū chı̍t ê thiⁿ-sài lâi khiā tī chè-tôaⁿ piⁿ, the̍h kim hiuⁿ-lô͘;

4

ū chōe-chōe hiuⁿ hō͘ i, thang chham tī chèng sèng-tô͘ ê kî-tó, tī chō-ūi chêng ê kim-tôaⁿ-téng. Hiuⁿ-ian kap sèng-tô͘ ê kî-tó tùi thiⁿ-sài ê chhiú chhèng kàu Siōng-tè ê bīn-chêng.

5

Thiⁿ-sài the̍h hit ê hiuⁿ-lô͘, chiong tôaⁿ-nı̍h ê hé tóe kàu móa, hiat tī tōe-nı̍h; chiū ū lûi tân, kap chiah ê siaⁿ, kap sih-nà, kap tōe-tāng.

6

Kia̍h chhit ki hō-thâu ê chhit ê thiⁿ-sài, chiū pī-pān beh pûn.

7

Thâu-chı̍t ê thiⁿ-sài pûn, chiū ū phauh kap hé ēng huih saⁿ-chham hiat tī tōe-nı̍h; tōe saⁿ hūn ê chı̍t hūn sio-lio-khì, chhiū-ba̍k saⁿ hūn ê chı̍t hūn sio-lio-khì, it-chhè ê chhiⁿ chháu iā sio-lio-khì.

8

Tē jī ê thiⁿ-sài pûn, chiū ū chhin-chhiūⁿ hé teh sio ê tōa soaⁿ hiat-lo̍h hái; hái saⁿ hūn ê chı̍t hūn chiū pìⁿ-chòe huih;

9

hái-lāi só͘ ū ê o̍ah-mı̍h saⁿ hūn sí chı̍t hūn; chûn-chiah iā saⁿ-hūn phòa chı̍t hūn.

10

Tē saⁿ ê thiⁿ-sài pûn, ū tōa lia̍p chhiⁿ teh to̍h chhin-chhiūⁿ hé-pé, tùi thiⁿ tūi-lo̍h-lâi; chiū tūi tī kang-hô saⁿ hūn ê chı̍t hūn, í-kı̍p tī chiah ê chúi-chôaⁿ;

11

chhiⁿ ê miâ kiò chòe In-tîn; chúi saⁿ hūn ê chı̍t hūn pìⁿ-chòe in-tîn; lâng chōe-chōe in-ūi chiah ê chúi lâi sí, in-ūi i sī khó͘.

12

Tē sì ê thiⁿ-sài pûn, jı̍t ê saⁿ hūn chı̍t, ge̍h ê saⁿ hūn chı̍t, chhiⁿ ê saⁿ hūn chı̍t, siū kong-kek, tì-kàu in saⁿ hūn ê chı̍t hūn pìⁿ-chòe àm; jı̍t-sî saⁿ hūn ê chı̍t hūn bô kng; mî-sî iā sī án-ni.

13

Góa koh khòaⁿ, chiū thiaⁿ-kìⁿ chı̍t chiah eng pe tī thiⁿ-tiong, tōa siaⁿ kóng, In-ūi kî-û hō-thâu ê siaⁿ, chiū-sī saⁿ ê thiⁿ-sài só͘ beh pûn ê, khiā-khí tōe-chiūⁿ ê lâng ū chai-ē, ū chai-ē, ū chai-ē.